上個星期喺日本返嚟可能撞啱轉天氣,初起感冒爆瞓三日之後;噚晚又再嚟料,我「唔認為」係公司班細路傳返比我(曲~),因為佢哋今朝見我帶住口罩「絕對無」做出勝利手勢兼同我講「Yeah!」,激死朕。
噚日揀咗隻恒指熊(61179)出嚟,喺朝早11點25分至下半場1點5分,見恒指5分鐘圖SlowSTC(14,3)出現超買,呢個時候就將(61179)送落場,按呢段時間(61179)高低位$0.055/$0.037拉個平均數$0.046作為買入價計算,去到噚日下晝恒指由本來唔上唔落、得嗰十零廿點波幅,至見有100點波幅,(61179)嘅賺幅信相可以補得返噚日輸個半隻牛證之餘,喺【下半part】講過如果有一個明確嘅方向的話,小注過夜都無妨;就按噚日恒指臨收市前半個鐘嗰表現,已經可以執定一隻熊證(唔一定係(61179),是但一隻同平時揀開有一段安全距離嘅熊證都已經夠)小注過夜,策略同之前嘅一樣,將(61179)嘅收獲當中攞部分出嚟小注買過夜,咁今朝起身你已經大豐收。
睇返恒指走勢圖,日線圖見今朝一個大裂口下插,恒指開市跌483點,做24766點,25000點就好似撈金魚個紙網咁,一拮就唔穿,即頭溶晒,頭四層貼價牛證全線死亡,呢度夾埋有3743張期指。依家9點57分,恒指開市無耐就梗係再插得深啲同狠啲啦,最低暫時見過24664點,即係話開市後再殺多層24700至27499點牛證,呢度有374張期指,加埋一完U盤就死嗰堆,total殺咗相當於4117張期指嘅街貨。
再落24600至24699點呢度嗰558張期指,呢度已經係目前牛證最重貨嘅一層,但相信當中有部分死咗,更多嘅係撤退;去到呢個位小妹相信好多人心裏面有個疑問:跌夠未?
坦白講市弱就真係唔好同佢估底,古語有云:跌市容易升市難,跌市係唔需要承托力,再加上依家喺「8」字尾年嘅10月,亦即係傳統股災月,引用老友魏力前日條稿裏面一段說話:「三次「10月股災」,分別發生在10月26日(1987年)、10月27日(2008年)及10月28日(1997年),恒指單日跌幅介乎12.7%至33.3%。」
望望月曆,今日25號,星期四;距離11月1日仲有四個交易日,咩事會令個市(甚至全球股市)一齊大冧?理由/藉口唔重要,最重要係你信唔信邪;更加實在嘅係下方殺牛點睇都易過向上殺熊,就算今日有個下跌裂口出現,但你見今日個下跌裂口比上一個下跌裂口(10月11日)嘅仲要低,已經唔係「一浪低於一浪」咁簡單,可以話係「一裂低於一裂」,就算個市彈高補裂口,但下行大方向仍然難改。恒指熊(61376),收回價25425點,全場最貼價熊證,但都講緊約26倍槓桿,世界難撈呀!
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo(下半part):#Gladyshan#
#輪證贏家# #輪證下半part# #窩輪# #牛熊證# #恒生指數#