熱門:

2018年10月23日 即巿股評 港股直擊

【盤房來料】10日線再失守 反彈或告一段落

當噚日坊間眾多專家認為中港兩地股市呢次反彈應有番咁上下勁度,只有阿Man力排眾議,大字標題呼籲博咗反彈,有食好食,小心北大人南巡過後打回原形。結果今日當習大大主持完港珠澳大橋通車儀式之後,中港兩地股市亦嚟一個攞景加贈興,雙雙插水。港股幾乎打回原形,而內地股市雖然只係嘔番噚日部分升幅,但上證指數又再失2638熔斷底部。

隔晚美股表現麻麻,雖然納指仍然企硬,但道指跟標指分別跌0.5及0.4%,當中又以金融股表現最差。而港股喺夜期跟ADR已回軟,今早港股低開後愈跌愈多。恒指低開137點後,報26015點已經係半日高位,其後喺內地股市亦腳軟下,跌幅持續擴大,繼而失守10日線(25713點),盤中更一度跌突噚日升幅,跌615點低見25538點。中午恒指報收25622點,跌530點;國指則報收10306點,跌184點。

人哋A股噚日創咗兩年以嚟最大單日升幅,回吐番一兩個巴仙都唔出奇,但港股幾乎將噚日升幅全部抹去,現水平亦將自上周五低位反彈一半升幅抹去,市底之弱可見一班。重磅股數嚟數去最勁係平保(02318),家吓仲企倒係75元樓上都算唔話得。而內銀股回吐幅度亦算溫和,但噚日都講過反彈已逼近阻力位,有貨喺手搵定個位止賺。

至於兩隻重磅國際金融股大笨象(00005)跟友邦(01299)分別跌2%及2.9%,前者被大行下調投資評級,後者則反彈至阻力位回軟。留意係隔晚歐美嘅金融股表現麻麻,未知跟意大利財政預算案遭歐盟否決有冇關係。最近消息係意大利已表明唔會就呢份財案作任何修訂,歐盟暫未表示點樣處置意大利,但意大利有乜冬瓜豆腐,定必令整個金融市場掀起風暴,意大利債務危機不容忽視,隨時產生骨牌效應,呢個亦係國際金融股走弱嘅原因。

騰訊(00700)之前股價急升,更回補下跌裂口,一度令缸邊友憧憬騰訊好快可以重返300元水平,但噚日阿Man已叫留意番292元呢個位,之前騰訊正正係失守呢個頸線重要支持而創年內新低,今次反彈至呢個水平未能企穩,反映呢一波反彈或告一段落。

至於其他噚日反彈得有板有眼嘅板塊,今日通通見回吐,好似濠賭股跟內房股呢兩個板塊,今日都嘔突噚日升幅,短暫嘅反彈未能改變已轉弱嘅走勢,反彈只係逃生門打開,唔好好把握跳車機會,又係喊得一句句。至於博反彈嘅,識買貨唔識食糊,又係隨時得個桔。記得博反彈只係相當短線操作,勿忘初衷,咪又短炒變長坐。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads