依家9點51分，剛剛upload完老友魏力篇稿之後，我聽住新聞直播台「港珠澳大橋通車儀式」單嘢，聽到澳門行政長官崔世安用國語致詞，真係比起佢當年宣誓時被人瘋傳個條「廣東話拼國語音」條片，真係進步咗好多，算係咁啦。
另一單「算係咁啦」嘅就係噚日隻恒指牛(69936)。噚日無講底話「吼5分鐘圖見SlowSTC(14,3)出現超賣先落場」就知呢隻要搶。就當噚日【輪證贏家】篇稿喺《信報》11點17分出街，由呢個鐘數起計至12點上半場完場，(69936)高低位做過$0.082/$0.067，拉個平均數就即係$0.0745；喺噚日下晝1點35分時，恒指做咗26234點嘅高位，至2點45分都keep住喺全日高位水平，(69936)期內高位低做過$0.084/$0.081，平均數即係$0.0825，用呢粒數同返個平均買入價$0.0745對比，即目前賺咗10.7%。
今日恒指再低開，依家10點5分，恒指跌逾300點，做緊25831點；但係暫時都仲叫做喺條10天線(25736點)樓上，日線圖嘅形態上都仲係彈咗上去，只不過唔係噚日好理想地去諗會出現三個白武士啫，所以如果噚日按【下半part】所講嘅，將噚日隻牛證賺到嘅放一半再留一半過夜；或者用當中部份嘅賺幅去博過第二隻嘅話，基於有一半盈利落袋，估計今日都未至於死傷慘重，頂多都係少少損傷。
再睇恒指牛熊證街貨圖，依家10點10分，恒指做緊25849點，麻煩啦，因為現價正好踩住喺牛熊中間位。上方熊證最貼價嘅係26200至26299點，如果用26200點門口位同現價計，兩者相差351點；下方熊證最貼價嘅係25600至25699點，同樣用門口位25699點計，同現價相差150點，而上行同下行嘅點數只係相差201點，對於依家有返咁上下波幅嘅市況嚟講，真係打個乞嚏就到。
中間位就真係最折磨人，反正噚日個裂口又補完，今日索性一動不如一靜算。
今日除咗係港珠澳大橋通車儀式之外，亦係我學弟Kitman嘅生日，最後一年「2」字頭嘅你要好好受享呀！生日快樂！
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
