隔晚美股插水，港股喺夜期跟ADR已逼近二萬五大關，今日大市低開後，亦一度考驗25000水平，結果當淡友滿心歡喜，以為坐定笠六之際，港股竟然嚟個大拗腰。恒指低開282點，開市後更曾跌逾300點，半日低位見25090點，創17個月新低。其後缸湖傳聞指內地保險金入市，刺激A股掉頭向上曾倒升。港股最多亦曾升44點，見半日高位25499點。中午恒指喺A股又回軟下，報跌87點收市，半日報收25366點；國指中午則跌11點，報收10124點。
內地股價今日有傳聞都炒內地保險金入場救市，但唔排除內地救市可能要北水班師回朝，對港股並非好市，而過去N咁多次，阿爺出手救市，都係救得一時，救唔倒多一陣。今次呢個消息傳出，似乎效用更加短，上證指數反彈至最高2503點又掉頭，半日收市仍微跌，表現強差人意。至於港股亦只係跟住A股上落，暫時仍然守喺25200點，亦即係25250至25450呢個密集區嘅底部之上。
內地保險金有冇真正入市無人知，但係人民銀行、中證監及中銀保監負責人，今日分別接受官媒訪問，打開口牌穩定市場信心。人行行長就話A股估值已處歷史低位；銀保監主席就話國經濟運行穩中向好嘅趨勢冇變，但主席係咪唔記得，中國第三季經濟增長放緩至6.5%，差過市場預期，至於話系統性金融風險完全可控，暫時呢一點可以接受，但地方債跟P2P債務狀況再惡化，無人可以寫包單。至於中證監主席亦提出6項措施以穩定提振市場信心，不過內地股民對A股信心低處未算低，最大鑊係內地已禁止強制平倉，再加埋融資融券死到直，內地券商可以話搞到雞無鴨血。當上證指數2500都跌破，硬要搵個支持位，應係250個月線，即係2317點，距離現水平仲有百幾點要殺。
重磅股方面，奇怪地唔少重磅股喺恒指創17個月新低之際，竟未有跌穿較早前低位，港交所(00388)、建行(00939)、工行(01398)跟平保(02318)更逆市上升。其他內銀股跟內險股，都錄得不俗升幅，個別股份升幅更超過1%。要數表較差金融股，要數友邦(01299)跟大笨象(00005)，雖然兩巨頭股價仍跟大市下跌，但半日股價收呢個水平都算出番枝楊燭，但穩定後市有一定作用。
至於騰訊(00700)早段見過273.4元低位，但騰訊未有跌穿前低位265元，缸邊友又開始懷疑人生，急不及待喺270元樓上掃貨。至於阿Man都係建議無貨都係再等等，反而騰訊已再唔係有買貴，冇買錯，依家應該係少做少錯。其他科技股亦腳軟，呢幾日納指一係唔插，插起上嚟都狠吓，科技股一直被視為估值偏高，要回調返去一個吸引水平，資金先會重新入場。
恒指同期指又係睇實幾個大位，25200至25400點好友嘅主要防線屢攻不下，但上面25750-25850點亦阻力無窮，淡友一見呢啲位有起勢咁沽，暫時港股仍然喺25000至25800之間煲嚟煲去，為咗乜無人知，阿Man就估計喺美國大選之前，資金未敢輕率入市。反正又係星期五，醒目嘅唔反對炒吓day trade，但想買貨長渣，依家都幾肯定時晨未到。
麥狄文
(徐狄怡‧證監會持牌人)
