|
熱門:

2018年10月12日 即巿股評 港股直擊

【盤房來料】港股反彈仍難補巨型裂口

美股隔晚雖再大跌,但盤後大幅反彈,道指期貨喺新加坡黑期反彈逾300點,加上內地9月出口數字遠勝預期,港股自10月開局已累跌逾2000點,技術超賣下借機會反彈亦好正常。恒指高開高開135點,開市後曾升190點,可惜早段A股續跌,拖累恒指升幅收窄至僅剩20點,見25287點半日低位。其後A股收復大部份失地,港股回勇突破早段高位,升幅擴大至超過300點,最多升326點,報25593。恒指中午報收25563點,升297點;國指則升140點,報收10233點。

大市焦點仍然係已連跌10日嘅騰訊(00700),半日回升5%,盤中曾高見281.2元,中午報收280.6元。不過騰訊噚日遺下巨型下跌裂口,要完全回補有難度,未知今日收市能否企穩280元,一旦股價再失275元,反彈或就此了結。

除咗騰訊之外,另一重磅股友邦(01299)亦為恒指出咗唔少力,半日反彈2.2%,短線阻力大約喺62.5元,要回補下跌口63.2元亦唔容易。至於平保(02318)反彈1.8%,唔少做淡平保嘅缸邊友都問,平保反彈來勢洶洶,有冇需要避一避,半日反彈至50日線及100日線之前,約73.65至73.8元見阻力,重上74元企穩淡倉要小心,畢竟相對其他重磅股,平保較為硬淨嘅,反彈力度自然亦較大。至於建行(00939)及工行(01398)及港交所(00388)亦錄得超過1%反彈,只有大笨象(00005)逆市跌0.2%。油價隔晚跌3%,三桶油今日逆市下跌。

隔晚美股反彈由科技股帶動,今日科技股普遍有不俗反彈幅度,其中舜宇(02382)上月手機鏡頭單月出貨量達1.01億件,首次突破1億,較去年同期增長61%,半日彈7.1%;其他科技股亦閒閒地錄得超過3%升幅。阿Man建議仲有貨喺手,要好好把握反彈機會逃生,預期喺下月美國中期大選前,市況仍然極度反覆,大市有反彈係把握機會跳車,而唔係貪圖些少升幅再入場送死。

雖然唔少人認為美股距離熊市仲有一段距離,但港股步入熊市已成事實,至於年內有冇機會爆發股災,阿Man冇水晶球當然答你唔倒,但等到股災先嚟走貨,往往已搭上屍殺列車,喺出現恐慌性拋售嘅時候沽貨,好多時就係沽咗個終極低位出嚟。喺呢個情況下,寧願輸少當贏,總好過泥足深陷再問點算。目前市況係以現金為王,建議就連MPF呢啲極長遠投資亦大部份轉去貨幣或保本基金,等待股災出現再慢慢執平貨。尤其港股情況似慢熊,陰乾式下跌殺傷力遠比一次性急挫更大,每一個下跌浪段都製造一批蟹貨,令每一次反彈力度逐步減弱。

預期港股反彈至25800至26000點已有阻力,尤其噚日遺下嘅巨型裂口短期內難以回補,浪低於浪嘅形態繼續,除非有重大利好消息,否則喺市況充斥不明朗因素下,港股仍然係易跌難升。留意恒指支持位大約喺25000至25200點,再失呢個關口,將下試24500點。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。