隔晚美股顯著下挫，道指狂插逾800點，標普跟納指分別跌3.2%及4%，收市後跌勢未止，道指期貨喺新加坡黑期再挫逾三百點，觸發全球股災。亞太區股市全線仆直，阿Man執筆時，日經指數跌近千點，其他區內股市跌2%係最低消費，最大鑊係雙十假期後復市嘅台股，跌咗6%成區內之冠。
恒指早裂口低開800點，早段插逾900點後，跌幅曾收窄至755點，見25438點半日高位，其後上證指數「甩底」，跌穿2016年熔斷底部，拖累港股增加沽壓，恒指勁插1033點，低見25160點半日低位。恒指中午報25207點，急挫986點；國企指數一度跌穿1萬點關，曾低見9989點，半日報10015點，大跌427點。半日成交額增至747億元，當中近百億由騰訊(00700)貢獻。
其實美股大插唔出奇，之前阿Man都提過美股位高勢危，而中美貿易戰一直拖落去，對美國經濟亦唔會有好處，美股難以長期獨善其身，尤其當其他股市已跌市相對便宜水平，美股唔想調整亦侷住大調整。美國三大指數已失守上升軌，加上隔晚股債齊跌極不尋常，對上出現咁嘅情況分別係2000年科網泡沫爆破，2008年金融海嘯，以及2014年嘅大調整三次，當時美股跌幅相當驚人，達到股災級數，今次會否係成為另一次股災，暫時難以肯定，但美股似乎已處於牛市完結的起點。
騰訊連日回購對股價零幫助，今日再跌逾7%，盤中低見265元15個月低位，半日報收265.6元，眾多藍籌股中包尾。其他成份股無一倖免，最低消費跌3%，強如中移動(00941)噚日到達80元水平重貨區後，今日亦隨大市回吐3.7%。唔少粉絲追問阿Man，手上持貨重創兩三成，現水平溝貨定打靶好，阿Man再一次重申，買股必定要嚴守止蝕，從買入一刻起，已要嚴格執行，通常阿Man會以買入價8%左右去設定止蝕，同時亦會參考圖表搵支持位，一旦失守支持位，有理無理先跳車，止蝕離場再觀察。若然呢止蝕都未處理得好，休想喺市場成為贏家。
留意春泉產業
基本上呢啲市況，指數權重股避之則吉，但弱市中依然有地方散發陣陣火藥味，講緊嘅係春泉產業信託(01426)，股價企硬當然有原因。集團持股量達14.82%嘅股東太盟，提出自願有條件全面要約，話充滿火藥味，皆因太盟去年曾提出罷免春泉管理人，但最終遭否決，今次明刀明槍用銀彈戰術，同樣以罷免管理人為首要任務，擺明要踢走眼中釘，實行新人事新作風，藉此提升春泉價值。
講番要約內容，要符合兩項條件︰第一，太盟要取得逾五成基金單位，第二，集團收購惠州項目不獲通過，後者將於本月29日舉行的股東大會進行表決，一旦開出綠燈，要約即宣布玩完。睇番太盟提出要約價達4.85元，較集團上市以來高位仲要高逾兩成，較消息公布前收市價3元溢價逾六成，出手可謂非常闊綽。假若以過往分派比率計，要收息8年始能得到相同回報。事實上，要約提出前，股價長期在3元水平浮沉，更重要係一旦要約失敗，股價肯定會打回原形。
作為股東可以點做？如果覺得作價吸引，梗係接納要約，仲要記得在本月底股東大會投反對票，當然，覺得現價水位足夠，也可沽貨食糊。總之，千萬唔好坐定定喺度，乜嘢都唔做，否則隨時得個桔，記住，幸福係要靠自己爭取。
麥狄文
(徐狄怡‧證監會持牌人)
