熱門:

2018年10月5日 即巿股評 港股直擊

【盤房來料】北水下周回歸吉凶難料

美國債息急升下,華爾街人棄債買股,但聯儲局又發放鷹味甚濃嘅訊息,加上10年期美國債券,被視為無風險資產,無驚無險穩坐釣魚船收年息三厘,何必仲要買股冒險,一於股債齊棄,擁抱現金,隔晚整個資本市場,包括債股金油,全線下跌。不過始終美股比人強,即使三大指數仍錄得下跌,尾市跌幅卻收窄,未如港股般倒水直落。

至於港股就苦過弟弟,雖然今早恒指低開120點,曾倒升15點,見過26639點半日高位,可惜人民幣離岸價又企住喺6.9水平,而亞太區內股市亦全面向下,港股沽壓復見,繼續插水至26373點半日低位,接近上月26219點52周低位。中午恒指報收26512點,跌111點;國指則報10497點,跌49點。

個市咁嘅款,重磅股唔使問梗係遭殃,只有中移動(00941)一枝獨秀,逆市升逾2%,講真阿Man都唔知點解。中移動離奇上升無原因,但一眾中資科技股則被大力洗板,因為來自彭博商業周刊報道指,中國解放軍在中國組裝的手機及電腦底板(Motherboard)中,偷偷裝上一粒比米更細的微型晶片(Tiny Microchip),用以竊取大企業機密和敏感的政府資料。當中以聯想(00992)最為慘情,半日最多急插兩成,盤中低見4.6元,半日報收4.91元,跌17.6%,成交大到無朋友,基金擺明要錢唔要貨。而中興通訊(00763)跌逾11%;中國軟件國際(00354)跌近7%;中芯國際(00981)及華虹半導體(01347)跌4.6%及3.9%,全被拋售。呢單傳聞雖然蘋果公司跟亞瑪遜已否認,但呢次竊密事件空穴來風,短期仍會困擾相關股份,暫時咪伸手接飛刀。

至於騰訊(00700)呢個科技龍頭低處未算低,半日低見302.4元逾一年低位,半日報收304元,恒指三分一跌幅嚟自呢個火車頭。至於新經濟股亦繼續捱沽,閱文集團(00772)跌4.1%、眾安在線(06060)又創上市新低26.05元,半日跌幅收窄至2.1%;小米(01810)跟美團(03690)亦曾跌近2%,半日倒升0.8%。總之新經濟股近日多災多難,股價上市後連番下跌,可能係IPO定價太高,家陣只係撥亂反正。

至於金融股個別發展,大笨象(00005)逆市升1%,算係撐住個市死得慢啲,但另一重量級友邦(01299)跌1.1%,已抵銷大笨象升幅。至於四大內銀股繼續下跌,內險股亦唔好得去邊。咁多重磅股表現疲弱,港股幾日跌逾千點後,想反彈亦有心無力,下周北水回歸,係大市扶手柄肯低位接貨,抑或係攞命藤,挾手挾腳掟埋一份,阿Man唔係大媽肚裡條蟲無法得之,反正有淡倉喺手就不妨鎖定部份利潤,過番個happy weekend。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads