息魔雖殺到，但無損美股表現，隔晚美股三大指數均見上升，而亞太區表現亦向好，港股今日咁啱係第三季度月結，亦借機做好，搞番靚少少個季結數。恒指今早裂口高開163點，再升至27928點半日高位，其後升幅收窄至64點，見過27780半日低位。不過A股表現唔錯，港股又回勇，半日恒指報收27886點，升171點；國指報收11062點，升123點。
雖然本港銀行加息幅度溫和，喺美國聯儲局八度加息1/4厘後，四大銀行噚日亦不過係咁矣加息0.125厘，即使隔夜拆息近日抽高，但港滙轉強，令資金暫未有流出港元壓力，喺本港銀行體系資金仍算充裕下，本港銀行加息暫時仍可嘆慢板。不過息魔重臨表現溫和，暫未對供樓一族有顯著影響，不過近日已陸續見住宅二手市場出現劈價求售個案，租務市場亦開始見租金下調，但求唔再空置，相信加息對本港樓市嘅影響將會逐步浮現。阿Man早兩日都講咗，加息周期開始，陀地地產股暫時避之則吉，今日相關股份普遍逆市向下。
至於其他重磅股，連日回購嘅騰訊(00700)都算唔爭氣，喺華爾街重磅科技股仍然係受捧對象，但騰訊今次反彈顯得缺乏活力，唔通央嬸嘅祝福真係邪成咁，睇住323元呢位，收市最好守得住，日線已經三連陰，失守埋條20日線，下星期真係瓜多過菜。
利率趨升有利國際金融股，友邦(01299)跟大笨象(00005)代替騰訊擔起魚缸火車頭，兩股分別升1.3%及0.6%。而中資金融股表現亦唔差，更有大行睇好內銀股今年跟明年前景，反正呢期A股彈得唔錯，相信內銀股有望更上一層樓。油價節節上升，中海油(00883)更成為第三季度表現最佳藍籌股，今日上半場再升4.3%，升至超過四年高位，其他兩桶油當然亦向上。
除咗陀地地產股腳軟，內房股繼續捱沽，由於內地傳出取消售樓花制度，變相為一眾內房股大力去槓桿，加上預期今年再冇「金九銀十」呢枝歌仔唱，房屋價則穩中有降，咁嘅情況下，內房股邊有運行。
美團(03690)上市後首次公布業績，虧損擴大至驚人數字逾200億，資金繼續撤走，半日股價跌2.8%,其他半新股亦捱沽，海底撈(06862)更小米(01810)亦創新低，連之前阿Man諗住可以冷敲嘅華興資本(01911)噚日上市潛水兩成後，今日繼續深潛，睇個款都係先撤離穩陣。
預計今日OTC結算，喺三點前大市都係咁嘅款，或者要三點過後，結算價塵埃落定，大市先有較大波幅，加上長周末前夕，一於食住花生等收市，過番個happy weekend。
麥狄文
(徐狄怡‧證監會持牌人)
