熱門:

2018年9月27日 即巿股評 港股直擊

【盤房來料】內房跟濠賭股仍未宜沾手

隔晚美國聯儲局一如預期加息四分一厘,而維持明年加息3次嘅預測。不過會後聲明則取消現時「貨幣政策立場依然寬鬆」嘅措辭,亦有提到通脹似乎唔多符合預期,美股隔晚由升轉跌,三大指數報跌收市。港股喺期指結算日表現反覆,中午收市喺成交薄弱下偏軟。

恒指高開95點報27912,開市冇耐即倒跌,一度喺50日線(約27793點)有支持,更曾倒升111點,高見27928點。其後A股走軟低收,港股再由升轉跌,最多跌178點,低見27639點。恒指中午報27693點,跌123點;國企指數報10938,跌46點。

重磅股騰訊(00700)連日回購,但股價反彈力度只屬一般,今日開始未幾即見腳軟,股價急急下跌逾2%,暫時半日報收323元,10日及20日線(325)失守,收市上唔番呢個位,反彈隨時告一段落。除咗騰訊,其他科技股表現亦麻麻,尤其兩隻同股不同權股小米(01810)跟美團(03690)亦齊齊插水逾2%,似乎新經濟股亦要繼續甚尋底之旅。

港息上升,國際金融股、本地銀行股亦受惠,但表現最好只有恒生銀行(00011),其他股份個別發展。至於息口敏感股本地地產股先升後跌,整個板塊均見腳軟。雖然香港剛剛開始調高利率,按揭息率仍然偏低,加息對樓市暫時未見太大影響,但美息已加咗咁多次,港息加息周期只係剛剛開始,難免對本港樓市濛上陰影,即使香港樓價唔大幅下調,過往樓市只升不跌嘅神話或到此為止。

噚日阿Man已提醒,內地剛剛再開始新一輪調控措施,今次喺預售樓花上面動手腳,變相係另類去槓桿。內房股今日沽壓持續,暫時仍未宜沾手。除咗內房股之外,濠賭股係另一個缸邊友經常吼反彈嘅板塊,但內地中秋節四日長假(9月22日至25日),澳門入境旅客只得39萬人次,較去年同期減少近20%,整個板塊繼續捱沽。

另一個表現較為疲弱嘅板塊係醫藥股,呢個亦係阿Man呢排都建議避之則吉嘅板塊,除咗之前受到政策打壓股價表現,今日到金斯瑞(01548)被沽空機構狙擊,指營運數據做假,股價急挫逾四成後停賽。早於去年金斯瑞股價仍為單位數字之際,阿Man曾推介,但當其股價升抵15元目標價後,阿Man已多次表示此股已炒過籠,估值過高,如今成為沽空機構狙擊對象亦一啲唔意外。

上周阿Man表示基建股仍為目前較可取板塊,一來受貿易戰影響有限,二來阿爺為保經濟增長,基建投資仍然係重點項目,相關股份當然受惠。今日整個板塊逆市跑出,都係嗰句,高追無謂,有貨喺手反而可以坐多一陣再搵位善價而沽。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads