放完一日中秋假期，內地A股亦復市，雖然未知北水有幾積極入市，但今日半場跟周一氣氛截然不同。恒指高開107點，雖然曾略為回落至27589點，但內地股市顯著做好，帶動港股升幅持續擴大，最多升460點，高見27959點，成功收復50日線(27805點)，亦完全收復周一失地。恒指中午報收27950點，升451點；國指則升244點，又跑贏大市，報收11071點。
周一阿Man已一再強調，只要大市仍守在27400點水平之上，反彈浪未必就此結束，而今日甫開市已成功站穩周一密集區27500水平之上，當然利好大市向上。再加上A股未有理會人民幣回軟繼續走強，MSCI明晟公布，正式啟動進一步增加A股喺MSCI指數權重諮詢。而富時羅素已計劃納入A股決定通知中國當局，明日將跟內地交易所舉行聯合記者會公布相關消息。
中資金融股回勇，其實周一已提及，中資金融股即使回見調，但沽售壓力唔算大，成交縮水，當日只係買賣兩閒，並未見缸邊友大力掟貨。平保(02318)跟國壽(02628)分別升1.9%及1.7%，前者只要企穩80元水平之上，有機會再向85元挑戰。至於三大行亦全面向上，建行(00939)、工行(013698)跟中行(03988)均升逾2%。
美國議息前大笨象(00005)跟友邦(01299)均見做好，預期今次香港追隨美國加息機會極高，不妨留意恒生(00011)、中銀香港(02388)、渣打(02888)及東亞(00023)等本地銀行，料可受惠利率上調。相反內房股暫不宜沾手，內地又再推新一輪樓市調控措施，或限制樓花預售，變相為內房股另類去槓桿，短期內房股仍然受壓。
內地汽車股受寶馬對第三季貿易相關利潤發盈警，更下調全年稅前盈利增長，華晨(01114)當然首當其衝，半日一度跌近一成，不過華晨寶馬合資應該唔受寶馬盈警所影響，半日跌幅收窄至4.9%，跌少一半。不過其他汽車股普遍逆市下跌，唯獨以新能源汽車為核心業務嘅比亞迪(01211)一枝獨秀，短線企穩55元，可望再向上挑戰58至60元。
雖然侵侵一再要求OPEC壓抑油價向上，但油價卻屢創近幾年高位，今日三桶油半日升3.2%至5%，油服股亦受追捧。但阿Man從來唔建議高追石油股，睇好油價後市走勢，寧願吼石油股回調至支持位再考慮上車。
新股海底撈(06862)今日登場最高曾見19.64元，較招股價升一成，中午報收18.3元，升幅略為收窄，留意博短炒海底撈，今日收市最好企穩開市價18.8元之上，跌穿低位17.86元收市，短炒最好先止蝕離場。睇睇隻美團點評(03690)，上市四日跌足四個交易日，若然首日上市博短炒唔嚴守止蝕，得到嘅就係一日低過一日嘅股價表現。
麥狄文
(徐狄怡‧證監會持牌人)
