今朝搭搭吓巴士時，出面無啦啦落雨，就落車先知原來同同事Josephine同一架車，兩條友一落車就跑上橋，好彩落車時又細雨返。
上個星期五(9月21日)恒指飆到唔識停咁，一朝早恒指牛(66205)同(66126)有你無你食咗先(我知下半場升得仲勁，但有餬就食啦，係咪)；但如果喺下朝見個市氣勢未弱時，打算再追多隻恒指牛博殺28000至28099點重貨嘅話，先係喺上個星期五嘅下半場，拆恒指5分鐘圖，係見唔到有一個超賣嘅水平可以比你入隻牛/Call，當中SlowSTC(14,3)喺下晝1點50至55分時最低都只係見「6」字頭，呢一個絕對唔係超賣水平，根本連中軸都未落返去。
其次係由點零兩點呢一下開始至收市，SlowSTC(14,3)都Keep住超買。如是者，假設你下晝想入市但根本就無位比你入；若然朝早或再前一日你已經有牛/Call在手，成個下晝對你嚟講根本就係放牛收Call嘅時間。更要再入牛/Call亦非我哋一嘅貫嘅策略。
至今朝見恒指裂口低百幾點開市，依家9點56，恒指跌幅進一步擴大至跌373點，做緊27580點，50天線(27811點)失守，依家下望嘅話就講緊係20天線(27391點)，換言之，今日一跌都尚算叫做喺條保歷加上升通道裏面；不過，如果畫返之前嗰條「中期下降通道」嘅話，依家恒指又處於呢條通道嘅頂喎...
至於恒指牛熊證街貨圖又點？下方牛證最貼價嘅係27200至27299點，呢度有相當於650張期指，同現價(用返頭先mark底嘅27580點計，兩者相差380點；至於上方嘅熊證，最貼價嘅係27900至27999點，呢度有相當於209張期指，同現價比相差419點。
照咁計就更係下行近又多啦，之但係頭先講到28000至28099點嗰堆過千張期指重貨仍然係度，仲只係熊證第二梯隊街貨咋喎，如果個市比多少少力嘅話，只要一個蜈蚣彈就可以殺得晒呢批街貨。不過依家又係就到期結嘅日子， 之前個市CHOK到癲咁殺咗咁多街貨，唔知會唔會趁個市又企係中牌位，等兩邊儲定多啲貨先再做嘢呢？方向唔係話無，只係唔多清晰，今日休戰。
唔知大家今日有無得放早，但相信返寫字樓嘅早一兩個鐘點都有嘅，小妹在此祝各位中秋快樂！人月兩團圓！星期三(26日)再戰！
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
