|
熱門:

2018年9月21日 即巿股評 港股直擊

【盤房來料】反彈浪未完勿逆水行舟

阿Man由周初已表示,美股喺今晚三重期結算前,一定係安全期,即使唔再上升,亦能力保不失,不過美股氣勢如虹,隔晚道指跟標指齊創收市新高,前者報收26656點,升251點;後者收報2930點,升22點;納指則收報8028點,升78點。美股暫時對一切負面消息免疫,即使美國10年期債息升越3厘;貿易戰跟楓葉國談判未有進展,華爾街視之如無物,美股照升可也。雖然美滙指數回軟,但無礙資金留戀美股市場,但美滙稍為回軟,有利環球其他股市發展,尤其係人民幣回勇,港滙亦唔再見資金流走,對中港兩地股市利好。

由於下周聯儲局議息加息幾乎成定局,隔晚美股金融股全面走強,港股嘅大笨象(00005)同友邦(01299)當然唔可以執輸,前者升1.1%,向住70元心理關口進發;後者更升2.7%。阿Man亦有強調,呢一浸大市反彈,中資金融股將會給力,除咗全球金融股向好之外,內地再三傳出阿爺有機會隨時再降準,建行(00939)、工行(01398)跟中行(03988),升幅由1.4%至2.1%不等,平保(02318)跟國壽(02628)亦錄得1.8%及2%升幅。呢一堆金融股,大大話話為恒指貢獻咗172點升幅,佔去升幅接近七成。

至於騰訊(00700)已連續回購十日,雖然金額唔算多,但買足咁多日,買盤嘅持續性反映公司有一定誠意。未知係咪因為三月份大股東減持嘅股份快解禁,下星期呢批蟹貨雖然機構性投資者未必會蝕住沽,但對缸邊友有一定心理影響,大大限制其升幅。睇番走勢股價由305.2元低位反彈,已收復10日線,今日開始挑戰20日線上試330元,下降軌阻力喺336元,即管睇下喺其他技術指標向好下,能否成功突破。

美團點評(03690)第二隻同股不同權股第二日上市,半日成交額高達第三位,可見缸邊友對新股仍有一定熱情。不過股價高開低走,半日逆市跌0.8%,望住72元呢個位,收市唔守都幾澤使。不過跟小米(01810)一樣,極速獲納入恒綜指數,但之前阿爺都講咗,短期未有意放寬批准同股不同權股透過互聯互通機制買賣,所以呢個消息已難再對美團帶來刺激。缸湖傳聞內地開快下調進口汽車稅,呢個消息唔單止打動4S汽車股落鑊熱炒,就連其他汽車股亦跟隨大市上揚,吉利汽車(00175)成為半日升幅最大藍籌股,半日升5.1%。

預計大市下半場仍有力再上,尤其係熊證重貨區喺27800-28000點,雖然大戶已殺盡27600-27700點嘅熊證,但下一重貨區只差一步,只要大市順手挑戰50日線。睇嚟呢堆熊仔都大有機會壯烈犧牲。總之暫時未係可以開淡倉嘅時候,反彈浪未行完,又何必衝出去逆水行舟。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。