哎呀!好彩噚日無做到任何嘢啫,如果唔係隻恒指熊(62584)又被人挾死!話說噚日下晝2點13分,食飽飽返到公司一陣,見到恒指倒升;再過多7分鐘,恒指做27065點,升132點,5分鐘圖上SlowSTC(14,3)嚴重超買。
雖說呢啲時間係將(62584)送落場嘅好時機,但諗深一層,恒指上返27XXX點,即係話由近牛區變咗近熊區啦,一開恒指牛熊證街貨圖睇,就見到恒指已經殺咗熊證最貼價街貨27000至27099點,呢度有相當於111張期指。再睇多次個圖,最貼價嘅牛同熊證區都同月同日死,直情係「左一巴、右一巴」,即係暗示「一動不如一靜」好過。
噚晚收到WhatsApp話:「中國對600億美元美國貨品徵收5%至10%關稅,下周一起生效」,心諗:又打貿易戰?唔通個市又落過去?不過中美兩家人今次公布新一輪關稅都未去到最絕地嗰隻,好壞參半,都係等個市決定啦。
而今朝喺屋企睇新聞見到日經升逾300點,隔晚美股又造好,即係話市場認為新一輪嘅關稅都未有太大威脅,所以今朝恒指開升85點,依家10點18分,恒指升幅進一步擴大至逾200點,做緊27308點,日線圖上恒指又撲緊上20天線/保歷加通道中軸(27419點)。
開埋恒指街貨圖睇,以暫時最高做過27342點計,恒指今朝先將27100至27199點,同埋27200至27299點呢兩part嘅街貨,合共220張期指做咗早餐;至於27300至27399點呢度,就有891張期指,只係屬於第二重貨區,但勝在近(根本就已經喺呢個範圍入面),而如果大市再食咗呢一part嘅街貨,即表代個市已有衝上20天線或上,27400至27499點嗰514張期指都可能凍過水。
「咁會唔會繼續向上升,隊埋上去今日見到嘅終極重貨27600至27699點嗰1172張期指?」做人嘅嘢又真係唔好貪心住,再望多次個日線圖啦。之前畫過恒指做緊個「中期下降道通」出嚟,其實依家呢條通道未走樣,而大市仍然處於「中期下降道通」裏面,不過見到「中期下降道通」嘅頂(大約喺275XX點呢個位)同條20天線/保歷加通道中軸相差100點到,即係估如果個市有力chok到上呢個位,再比多100點佢頂埋個「中期下降道通」嘅頂,之後就真係要再睇吓後市有無啲咩借口/理由/原因/誘因升穿啦。
恒指牛(65682),收回價26237點,同現價有逾1000點差距,小注吼5分鐘圖見超賣落場。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan#