一直叫大家睇實上證指數2016年熔斷低位2638點頂唔頂得住，今朝落到去2644點，眼見就快跌落懸崖，下午中段見阿爺又出手救市，今次由之前睇番好少少嘅基建股，以及保險股領軍，反而唔係太靠內銀股。恒指下晝由跌百幾點至倒升200點，大概用了30分鐘，唔係特別急，炒鬼跟得快好世界，好過悶足一日。
熊市反彈誘惑可以很大，尤其是現時輪證市場選擇範圍廣泛，只要條款夠中庸，正股走勢夠殘的話，隨時短炒執幾成，不過散戶最忌貪勝不知輸，賭博心態太重，往往未夠「鐘擺」就出手，一唔夠運損手爛腳。
中生製藥(01177)今朝係最超賣藍籌，RSI跌到24，國策因素已反映了幾日，九連陰下反彈唔奇，眼見正股下午由跌轉倒升1%，上車買6.8元收回之中藥牛(59201)，正股之後升幅有4%，報7.42元，(59201)即市回報約一成三。中生製藥在周線圖剛好跌至100周線支持，有機會喘定，炒炒反彈。
上證指數今日一彈，睇真點無乜特別，只係上番5天線爭持，上面條10天線約2744，要大成交爆穿才令市場相信短期見底，否則若一彈又軟，2638久守必失。
恒指亦一樣，今日收復10天線，廿天線27450料又會壓住，始終100天、50天、20天及10天線均向下整齊排列，淡友隨時又發動攻勢，恒指牛太近收回價忌過夜。
羅崇博 (杜比)
