噚日揀出嚟嘅恒指熊(62584),喺下晝1點10分見恒指SlowSTC(14,3)上到嚴重超買水平時可以落場,當時證價高低位$0.081/$0.079, 拉個平均數即係$0.0815,但其後見SlowSTC(14,3)下行,恒指都無郁到,都唔知今日恒指係咪喺度玩佛系,正當不以為以之際,5分鐘圖上SlowSTC(14,3)再上,但同時恒指都緊上(即係跌少咗),(62584)即刻有反應,喺2點32分證價報$0.068,呢個蝕幅無可能唔走,如是者壯士又斷咗一臂。
明白到好友經歷大市之前六連跌之後點都要回一回先落到啖氣嘅。唔通我呢一吓係被班好友挾死嘅?有咁嘅諗係完全係因為大市分鐘圖上嘅技術指標出現上/落都好,但偏偏點數就無乜點郁;噚日喺《下半part》講過「班好友相當之有可疑,如果係,呢個仇我一定要報!」
今日終於都有巴士可以坐返工,喺巴士上見到恒指開市跌80幾點;依家9點57分,返到公司兼收完果籃再托埋designer Ken幫手換盒冰皮等下晝時可以一班人分咗嚟食做tea之後,恒指二話不說就跌230點,做緊26702點,噚一嘅跌少啲,我隻熊仔果然係被人挾,(62584)你走得好唔抵呀!
依家10點5分,按恒指暫時最低做過嘅26648點計,喺最貼價牛證26700至26799點嗰410張期指已經全數陣亡,26600至26699點變成第一梯隊,而呢度就有161張期指。至於牛證重貨就喺26200至26299點,亦係第五最貼街貨區呢度有911張期指,同現價(10點17分時mark低嘅26792點)相差592點。
至於上方熊證最貼價嘅27000至27099點,同現價比就只係相差307點,不過就得111點,同埋同下行唔同嘅係,如果現價向下行五層樓落到去重貨區嘅話,其實沿途都有百零二百張嘅街貨可以掃得到;但上行嗰307點就真係要硬食乜都無先至爬得到上去。
睇埋恒指日線圖,繼如噚日所指如果恒指是沿保歷加下降通道向下走嘅話,咁上個星期五(9月14日)最接近保歷加通道中軸呢一吓,之後噚日同今日回落,都幾可很肯定係遇頂回落,要留心嘅係保歷加通道口有拓闊嘅跡象,味意着連保歷加通道都比位個市行,適逢依家下行中,難道個市真係仲有得落?再來恒指熊(62584),收回價27538點,同現價有逾700點距離,啲有過千點差距嘅熊證街貨量都唔少,呢隻算正常啲,約31倍槓桿比率屬於同收回價中最高,其他嗰啲……坦白講有啲揀唔落手啦。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan