噚日揀咗隻恒指熊(62033),策略係以快打慢(即係盡量day trade),喺噚日朝早11點30分,恒指5分鐘圖SlowSTC(14,3)出現超買,呢個時候送(62033)落場,證價係(高低位)$0.105/$0.104;持貨到下半場1點30分到,恒指5分鐘圖上SlowSTC(14,3)再次回落到超賣水平,按我哋本身要以快打慢嘅策略嚟講,呢個鐘數係可以將(62033)放走,而呢個時候證價做緊$0.117/$0.115(高低位),不消兩個鐘就已經食咗最少九格,學讀者Ka Ming話齋:之前隻熊仔買完月餅,依家都應該可以買埋罐普洱飲消滯。
依家9點51分,見到電視出恒指跌穿26300點,再跌至逾一年低位,見到呢句即係話如果噚日隻(62033)無走到嘅話,今日就可咬多一大啖;係嘅,不過有早知邊會有乞兒,如果Paul少(噚日講大台套新劇裏面黃子雄做嗰角色)一早知雷曼破產嘅話,就唔會接咁多"I kill you later"(accumulator)啦,same same。
依家9點57分,恒指做緊26266點,而暫時嘅day low係26259點,恒指牛熊證街貨圖上見到最貼價嘅26300至26399點,街貨比噚日多咗432張,上到1343張,噚日估嘅「如果個市喘定嘅目的係引更多嘅街貨流入貼價牛,再從而由一個咁近嘅位置乘保歷加通道口拓闊向下殺肥牛」中咗前半;後半嚟講依家見保歷加通道底係26249點,對比暫時做過嘅低位(26259點)同噚日保歷加通道底(26271點),又確係拓闊咗個底比位恒指走返入通道嘅同時,比更多嘅空間個市可以向下殺喎;至於最後嗰兩粒字「肥牛」,過千張期指咁就做咗早餐,呢份早餐仲富豐過同事Thomas今朝鋸晒扒咁,咁你話肥唔肥?
上方熊證27600至27699點呢度有928張期指,比噚日增加咗387張,量唔算話好多,可能正如噚日同輪商朋友Daniel吹水時佢講起依家啲投資者對輪證嘅risk managment意識提高咗好多有關,逐吓逐吓食都係risk managment嘅其中一個方法嚟架。計返數,最貼價熊證同現價仍然有過千點嘅差距,依家10點7分,恒指keep住做緊今日/逾一年新低,依家10點10分,恒指新低位係26219,睇嚟都可以準備將26100至26199點嗰565張期指視為第一梯隊街貨,26200至26299點嗰896期指同全軍覆沒無乜分別。
同一個故仔再次發生嘅話,就會演變成好友將防線向後移,甚至移到落26000呢啲整齊點數嘅所謂「大關口」,咁無人話過呢啲「大關口」承托力夠嘅,要擔心嘅就小心一下依家14RSI穿30,而SlowSTC(14,3)亦落到0呢個無可再退嘅水平。
按走勢計又真係好難再落;按街貨計又無理由唔殺,既然唔清楚方向嘅話咁做咩好呀?避險唔trade住囉。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan#