美股隔晚假期,港股少咗個指南針,變得無方向。一方面意大利已承諾喺降低稅負嘅同時會遵守所有規則,即係盡量將預算赤字維持喺歐盟3%預算赤字上限之下,有助平息市場嘅緊張情緒。但另一方面,新興市場貨幣仍未止瀉,美滙指數仍企於95,幸而人民幣總算喺6.83定落嚟。至於港滙指數則喺拆息上升下,亦喺7.849停咗,但7.85弱方兌換保證預咗會繼續觸及,金管局喺呢個月內難免繼續接錢,留意本港銀行體系結餘會否進一步跌穿500億元警界線。
恒指今早低開93點,開市後進一步跌148點,見27564點半日低位,其後A股跌幅大大收窄,港股亦隨之拗腰,一度倒升92點,高見27805點。恒指中午報27721點,微升8點;國企指數報10790點,跌22點。半日成交額縮水至只有347億元,反映港股喺27600水平爭持嘅情況下,買賣兩閒,或者大家都等緊周四美國會否向中國2000億美元貨品微收關稅,同埋中國會點樣報復,所以大家都按兵不動。
騰訊(00700)插水幾日後,今日終於識得反彈,若非騰訊為恒指貢獻33點,上午收市恒指仍然要報跌。不過騰訊總算守住330元,半日報收337.2元,呢一次反彈或者可以回補之前嘅下跌裂口部份,即10日及20日線水平,亦即352元。至於另一重磅股大笨象(00005),果然守住100周線,暫時喺68元停咗落嚟,但能否止跌回升,仍言之尚早。
其他重磅股升跌參半,表現較突出喺長實(01113),回購行動撐起股價,半日長實升3.4%;至於同系嘅長和(00001)跟長建(01038)則分別升2.7%及0.5%,只有電能(00006)跟隨其他公用股有啲腳軟。公用股回軟,普遍係大市反彈嘅指定動作,留意大市成功守住27600點,並兩度喺27500掉頭回升,唔排除繼續喺區間內向上移動。
暫時指數移動區間喺27500至28500點,不過27800點有一定阻力,而28200至28300點,呢個上月底結算前嘅最大轉倉位,阻力更大,淡友將更守呢一關,皆因28200至28300點升得穿並企穩,可以進一步挑戰28500,甚至28800點,即使做淡亦要留意,咪太死牛一邊頸。
不過自從北水減少入,甚至大大力沽個別股份,令上月為自互聯互通機制啟動以嚟,北水淨流出最大一個月,相信短期北水唔回頭。暫時港股都係跟住A股上落,成交少得可憐,下半場未必有太大變化,睇嚟又係另一個花生日。
麥狄文
(徐狄怡‧證監會持牌人)