熱門:

2018年8月21日 即巿股評 港股直擊

【盤房來料】中美未重啟談判 侵侵先撥冷水

「侵侵」再次批評聯儲局加息,未能配合其刺激經濟方案措施,矛頭更直指其親身委任嘅主席鮑威爾,令美元滙價回軟,美滙指數跌穿96,令人民幣中間價再三反彈,中港股市亦延續其反彈勢頭。恒指今早高開72點報27671點,早段一度倒跌71點,低見27526,但A股勁彈,帶動港股再發力,盤中曾升167點,高見27765點,逼近10日線(27798點)。恒生指數半日收報27729,升131點;國企指數半日收報10743,升111點。

雖然藍籌股普遍上升,但火車頭騰訊(00700)今日就死咗火,開市355元經已係全日高位,過到10日線(351.6)但過唔到20日線(356.4),半日微跌0.1%,連10日線亦企唔穩。阿Man有提過,騰訊反彈至352至355元必遇阻力,即使有消息指內地有意重新審批新電遊,亦唔見對其股價有刺激,可見騰訊呢鋪不過係技術反彈,仍有貨喺手,真要好好考慮再減持,甚至跳車。

石藥(01093)係半日升幅最大藍籌股,公布業績後獲大行上調目標價,明日派成績表嘅恒指新貴中生製藥(01177)亦落鑊,半日錄得7%升幅,其他醫藥股普遍回升,不過醫藥股走勢亦未扭轉,目前不過係反彈,加上之前個別醫藥股更已炒過籠,估值過高自然要捱沽。

至於另一個反彈顯著板塊係教育股,同樣係教育股估值唔平,兼且目前政策上有所改變,教育股或未能保持之前以透過不斷收購去維持高增長,增長速度放緩,自然不配有咁高估值。未有喺上周低位撈貨,借過咗博反彈機會,現水平更唔值得再追入。

今次港股反彈主要係中美雙方重啟談判,明日起一連兩日再開會,不過「侵侵」已潑定冷水,指對談判能達成協議嘅期望有限。其實侵侵開打貿易戰,當然係跟11月中期大選嘅競選計劃一部份,難得大部份美國人都受落,令其民望節節上升,既然呢一戰能為其帶嚟選票,「侵侵」又點會輕易罷休。

土耳其危機雖有所紓緩,但問題仍未解決,而美國跟土耳其關係亦未見善,而巴士雷亞爾亦創新低,新興市場貨幣爆發危機風險仍高。另一方面,意大利喺債台高築嘅情況下,屋漏兼逢連夜雨又搞單塌橋,來年預算案又要大興土木搞基建,屆時意大利嘅財赤,或逼近至超過其GDP3%,將超出歐盟允許上限。一旦意大利債務超標,唔單止評級機構降其信貸評級,連歐洲央行亦可能停止再買意大利債務,屆時整個歐洲將大幅震盪,不得不提防意大利呢隻黑天鵝。

內地股市話有國家隊入場,但北水未見積極流入港股,而內地基金入場掃A股,亦不過係為疲弱嘅內地股市帶嚟短線支持,一旦人民幣再度轉弱,資金繼續撤離的話,A股隨時打回原形,港股亦難以獨善其身。留意港股反彈逼近10日線後,除非能突破20日線企穩,否則難以重返二萬八大關之上,博反彈適可而止,短線期指好倉留意27400-27500點,失守應止賺好倉,緊記反彈只會係短暫而快速,一不留神小心又被綁死。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads