嘩!唔知各位今朝5點幾嗰時有被雷嘈醒?我有,仲嚇到成個彈起咁滯,起身閂好啲窗之後再瞓過,鬧鐘一響再望望電話,有個message喎,心諗:唔通黑雨?開嚟一睇,頂!「Amber Rainstorm Warning Signal was cancelled」唉...
上個星期五(8月17日)有點過隻滙豐控股(00005)出嚟睇,事關貪佢日線圖上嘅SlowSTC(14,3)出現嚴重超賣,不過都補多槍叫大家叫心,因為SlowSTC(14,3)絕對可以超賣再起賣,%K線同%D線嘅數值絕對可以喺「零」,滙豐Call(24987)唔好心急落場。
結果今日恒指今朝早開升60點之後,依家9點57分,恒指一度升逾200點,依家就做緊170點,做緊27383點,就真係唯獨是滙控玩斯人獨憔悴,70元失守。若然拆開5分鐘線,就見到上個星期五下晝2點30分,SlowSTC(14,3)曾經出現過超賣,不過之後由超賣彈返上下晝2點50分至3點5分嘅60以上水平時,滙控股價其實係無郁過咁滯,咁嘅情況都知有伏,既然一開始就告戒咗唔好心急落場嘅話,咁喺臨收市前20分鐘再見SlowSTC(14,3)出現超賣時就更加唔應該落場。Even到今日,滙控都仍然喺個watch list度就算啦。
滙控未有得玩就望吓大市有咩好玩啦,依家10點4分,恒指做緊27209點,開埋恒指牛熊證街貨圖出嚟睇,上方最貼價嘅熊證喺27900至27999點,呢度有相當於667張期指,同現價比仲差成709點見食到,但絕對唔係重貨區;下方牛證最貼價就係26800至26899點,呢度有1974張期指,呢度先至係重貨區,講緊嘅係牛熊兩邊比較之下嘅重貨區,同現價比就差409點先可以食得晒。
咁樣秤之下當然會覺得下行點數少、期指多,所以應該選擇下行啦;但留意返,其實不論上定落,點數差距都唔細,講緊下行都要409點,你諗吓,單係個市無啦啦郁400點,你估做新聞個班會唔會做個半死?預期博個市再衝,倒不如相信佢等多啲新嘅貼價證出街,再儲多啲又近啲嘅貨,先至再食多次好過。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan