熱門:

2018年8月16日 即巿股評 港股直擊

【盤房來料】反彈至前底27500前又乏力

隔晚土耳其危機深化,一度拖累美股早段狂插,拖累港股夜期及ADR一度急跌至26600水平,其後美股跌幅收窄,港股亦重上26800水平。今早大市裂口低開452點,報26871點創超過一年低位,其後內地股市跌幅收窄並倒升,港股亦曾重上27405點半日高位,倒升81點。不過港股弱底就係弱底,尤其反彈至27400水平,剛好係前底部27400至27500點之前即見阻力,港股即回復跌勢,中午恒指報收27155點,跌167點;國指則報10476點,跌58點。

留意半日成交增至737億元,唔排除期指淡倉部份盤鎖定利潤平倉之餘,空軍亦開始平沽空盤,令半日成交大增。暫時大市尚算守住二萬七水平,但27400至27500前底部失守之後,已由支持變阻力,短線反彈除非能重上此水平,否則阻力前又回頭,只有稍有利淡消息傳出,港股二萬七關難保,料再向下尋底。

騰訊(00700)交出一份差過預期嘅成績表,大行早前已不約而同調低目標價,出埋一份咁唔爭氣嘅業績,預期大行又陸續踩多兩腳,調低埋盈利預測。北水今次甚有先見之明,早喺業績公布前已急急沽貨,缸邊友講笑女估神劉央唔知有冇份掟貨,阿Man認為央姐掟貨機會甚微。上次騰訊跌至400元水平,央姐表示大手掃貨,更有信心騰訊年內見500元,股價未來定見千元大關。可惜自從央姐買入騰訊之後,騰訊股價每況愈下,央媽由女股神變估神再變埋燈神,睇嚟有排唔使見家鄉。有人問阿Man騰訊幾時可以撈底同見底,一向阿Man唔估頂亦唔估底,今次當然唔例外,不過畀個貼士大家,或者有人見央姐高調宣布盡沽騰訊離場,或者就係騰訊見底之日。

至於其他科技股個別發展,騰訊死死吓,旗下閱文集團(00772)破發後再創新低,半日最低見50元,中午報收50.9元弱勢反彈作用有限。小米(01810)同創上市後新低15.52元,現價16.02元計招股價潛水,一向都話小米估值過高,家下連股王三十幾倍PE都被嫌棄估值太高溢價,更何況估計超過70倍PE嘅小米。不過科技股又唔係一面倒插水,今日有個別股份反彈,只係反彈力弱博都無謂。

其他重磅股有升有跌,大笨象(00005)除淨半日跌逾1%,股東未能財色兼收。至於中資金融股跌勢略為收歛,但跌就係跌,暫時唔覺可以出手接飛刀。美元走強令貴金屬下跌,金屬期貨隔晚更集體插水,香港呢邊嘅資源股同樣齊齊陪跌,雖然資源股未見洗倉式插水,但之前升幅唔算多,同樣道理插水力度亦無咁強。

唔少粉絲問阿Man個市幾時可以撈底,講真港股步入熊市後,反彈力度一次比一次弱,一個唔好彩今轉水反彈至27500就回頭,現水平27200走去博仲有幾多空間。阿Man除持有現金外,另一個對應熊市方法係逢高做淡,家陣等等反彈會否喺27400至27500完結,反彈完成的話,大市隨時再失二萬七,隔晚夜期嘅26600水平一定做番畀你睇。

P.S. 明日周末前夕,阿Man又忍唔住要蛇王外遊,咁嘅市況實在無限睇,明日盤房來料暫停,下周一回復正常,預早跟大家講句happy weekend。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads