噚日你有無份喺港交所(00388)個披露易嘅website狂禁F5先?我有,就算你無去披露易度,點都有reload一啲財經新聞page掛。以往騰訊(00700)都係5點零,最遲5點半就出業績,等到5點40幾分都唔見時,我同戰友Jack唔知做乜都燥燥地,「做咩啫?樣衰到唔見得人呀?」、「醜婦終須見家翁嘛」,到最後業績接近6點出,一地眼鏡碎。
今朝恒指開市跌452點,27000點無咗;唔難估,事關噚晚係咁追住隻騰訊嚟做故仔/新聞,由港股收市追到德國ADR,再追到美國ADR,都係見紅仲要係大把大把咁摑落去,不過騰訊就真係未死嘅,就算話佢「駕崩」,都只係話佢「崩」盤啫,皇上有事喎,仲唔一村人出嚟護駕!既然預咗有血肉長城出現嘅話,隻騰訊熊(58193),今朝開市即走人啦,仲諗咁多做乜。
依家10點14分,今朝先我隻app同web冧serevr(太多人search股價啦,做唔切生意呀),同Data provider兼老友Zoe吹緊水嘅同時,見住個市由跌400幾點彈返上倒升70幾點,過多3分鐘又見紅,跌11點,嘩!呢啲咁嘅市,真係唔識玩。
今朝恒指個大裂口,兩三吓手勢就已經補咗,日線圖見SlowSTC(14,3)有觸底準備升嘅跡象;至於皇上,暫時做過高位$332.6,比噚日嘅低位$336元,仲有$3.4,惟日線圖技術指標未見有利好訊號發出,估計市場會繼續大嗌「護駕」同「保護皇上」,但小心一班券商先後齊齊大幅削(調低都唔夠,係真係削)目標價/評級/盈利預測;同時北方(股價圖個頂呀)條100天線($393.19)同250天線($392.47)一旦相交形成最後一個「死亡交叉」,五條平均線倒序排列,分分鐘再南下攻打,到時唔知仲有幾多人「保護皇上」呢?
今日觀戰好了,辛苦晒大家,打贏咗呢場應該歷史上會稱為「騰訊業績見光死」嘅一仗。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan