土耳其貨幣危機有所緩和,隔晚美股做好,三大指數皆升,標普差32點重返歷史高位,美股可以話盡吸天下資金。據資料顯示,大部份投資經理嘅組合,目前持有美股比例,係自2015年以嚟最高,即使美國經濟稍後或受貿易戰影響而增長緩,甚至倒退,但喺基金經理心目中,美股仍然係全球股市首選。「侵侵」自上任以嚟,經常將其政績跟美股表現掛鉤,事實上「侵侵」成為美國總統後,美股一直跑贏全球股市,而減稅及強美元已成功吸引全球資金流入美國,難怪「侵侵」一直民望高企。想貿易戰有停落嚟一日,除非「侵侵」民望插水。
中國喺貿易戰上一直被動,甚至可以話處於下風,除咗任由人民幣逐步貶值,似乎已無其他對應方法,難怪阿爺出手穩住人仔唔夠一星期,人仔又回復弱勢。而港元亦隨住大型招股活動完結,拆息略為回落嘅情況下,港滙再度走弱,跌至7.85弱方兌換保證,金管局再度出手,中港股市係滙價疲弱下,顯著受壓。
雖然隔晚美股做好,但港股仍要略為低開,其後跟隨內地股市大幅下滑,盤中跌幅一度擴大至463點,低見27289點,恒指中午收市報27330點,跌422點;國指重挫205點,報收10538點。
北水唔等騰訊業績公布,連日內狂沽騰訊走人,唔知係咪早有春江鴨收到風,內地因應部門重組,暫停審批新嘅電腦及手機遊戲。本來都有心理準備騰訊手遊業務增長放緩,季度更會出現倒退,諗住新手遊陸續推出有助抵銷舊遊戲收入減少嘅負面影響,家陣又傳出咁嘅消息,確係屋漏兼逢連夜雨,股價今日半場再跌3.6%,跌穿之前低位。望望騰訊嘅牛證街貨重貨區分布,今日已劏唔少肥牛,剩低330至334.9嗰一批肥牛未劏,一旦業績出嚟有乜冬瓜豆腐,呢批牛證難逃一宰。其他藍籌股不提也罷,除咗公用股成為資金避難所表現較硬淨之外,其他普遍偏軟,就連中電(00002)破頂後亦要倒跌1%,只有萬洲(00288)公布業績後逆市上升6.8%。
熊市已再無強勢股,幾個熱炒板塊先後被放血,科技股、教育股及醫藥股今日繼續捱沽,基金擺明要錢唔要貨,撤離港股意圖相當明顯。之前熱炒嘅物管股,隨時成為下個開刀對象,睇番一堆物管股嘅圖已走樣,仍有貨喺手亦好應該考慮撤退。
至於恒指一再穿底後,繼續其尋底之旅,預計下一站要先到100周線(27017點)方有微弱反彈,二萬七呢一關守唔守得到,要睇內地股市及外圍有否利淡消息再傳出,若然外圍穩定,呢一輪跌至100周線或有反彈,但觀乎近日反彈力度一次弱過一次,可能前底部27500已由支持變為阻力,大家好自為知。
麥狄文
(徐狄怡‧證監會持牌人)