熱門:

2018年7月18日 即巿股評 港股直擊

【輪證贏家】恒指牛又儲肥中

噚日用恒指牛熊證街貨圖同走勢圖上嘅「三角形」去睇,大市待爆格局出晒嚟之餘,個勢亦傾向下行;再加上《下半part》睇埋恒指波幅指數(VHSI),日線圖上嘅SlowSTC(14,3)%K線同%D線分別報8.277同6.925,噚日睇條%K線都仲未升穿條%D線,不過今日好明顯升穿咗,換言之大市將有好大幾會出現較大波幅嘅走勢。

於是就揀咗隻恒指Put(21836),行使價27500點,但可惜等到下晝3點10分同3點55分先至見到恒指5分鐘圖SlowSTC(14,3)凸起咗少少,留意返,只係凸咗少少出嚟(%K線同%D線連70都未到),未能夠符合到確實入市嘅條件,所以最終都係坐足一日。

今朝返工恒指裂口高開升171點,報28352點;依家10點5分,最高見過28386點,但依家升幅明顯收窄至得28249點,升緊67點咁大把。

就用呢口價度落去恒指牛熊證街貨圖,下方最貼價牛證就係28100至28199點,呢度有相當於340張期指,同現價比都係差200零點,唔算遠;而下方嘅重貨位仍然都係27800至27899點,呢度有成463張期指,再望落多兩層,即係27600至27699點呢度,嘩!又多咗一層過千張期指街貨喺度,咁重貨,搞咩呀!

再睇埋上方熊證,最貼價嘅係28600至28699點,呢度得17張期指,size同去酒樓飲茶枱面嗰碟花生、青豆一樣,仲要現價要向上彈升多351點先可以敲到度門,「咁遠?」係呀,嗰碟花生、青豆都收你10蚊架!

雖然係咁,不過都唔可以話熊證無睇頭嘅,事關上方最重貨嘅29000至29099點都有過千張街貨架,只係比噚日少咗551張咁解啫。

成個恒指牛熊證街貨圖個格局就同個啤梨一樣:「上瘦下肥」,即係話資金對後市看高一線,不過真係咁易放過堆咁重貨嘅肥牛?我完全明白若然買中咗「三角形」爆出嚟嗰一方係幾咁禾味,不過呢個50/50機會率,而個「三角形」又咁對秤,比我欣賞吓先啦,至少係佢未上10天線之前比我再望多兩眼啦。

[廣告時間]各位鄉親父老,叔伯兄弟,一年一度嘅書展又嚟啦,小妹本《Swing Trading──鐘擺戰策贏港股》喺書展Hall 1 嘅博顥出版社(1A-E12)有得賣架(其實喺書局都有嘅),誠蒙大家嘅關照,咁啱路過嘅,比個面揭兩頁呀;啱睇囉,咪買返本返屋企囉!多謝晒!(咪以為寫書搵到好多錢呀,印咗出嚟hea喺度,我驚我下世做樹精咋,哈哈!)

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads