熱門:

2018年7月16日 即巿股評 港股直擊

【盤房來料】部分指數基金侷住買貴米

上周五美股靠穩,納指更連續兩個交易日創收市新高,以為港股可被帶動再彈高些少,豈料今日都係高開低走,受累內地股市再度回軟。恒指早段高開55點後,一度升至28699點半日高位,可惜呢個位仲低過上周五高位,反映港股反彈力度確相當有限。早段恒指曾跌198點,低見28327點,半日報收28477點,跌47點,勉強守住條10日線(28435點)。國指則跌79點,報收10667點。主要又係A股陀衰家,內地主要指數均見下跌,上證又再逼近2800點,半日報收28017點,再跌13點。雖然內地公布第二季GDP按年增長6.7%,符合市場預期,但增長開始放緩,加上受債務違約危機所困擾,短期繼續無運行。

內銀股又回復弱勢,上周五見北水趁反彈沽貨,都知道內銀股反彈隨時又告一段落,建行(00939)跌1.1%;工行(01398)跌0.7%;中行(03988)低見3.57元創一年低,半日跌1.1%,確係無陰公。好重磅股友邦(01299)跟騰訊(00700)仲頂得兩吓頭搥,否則大市跌幅更大。不過騰訊即使喺380元尚算企得住,但反彈卻顯得有心無力,小心捱得過初日,捱唔過十五,咪以為380元呢個係鐵底,今次380再失守,有機會再尋底,直落365元先識停車。

上周五喺美股開市前,港股夜期曾顯著下跌至28300水平,皆因人民幣匯價又急跌,阿Man都提過好多次,人民幣貶值對於持有較多外債嘅內房股並唔係好事。而且阿爺上星期都表示,下半年嘅房屋調控並唔會放鬆,內房股繼續無運行,半日至少跌超過1%,更甚跌超過4%嘅內房股數目亦不少。

至於表示獲解禁要重新出發嘅中興通訊(00763),股價半日再升17.3%,報16.12元創超過一個月新高,只係未來兩年公司盈利都要食白果,加上美國佬講到明,有乜唔對路,隨時可以再出禁令。中興今次險過睇頭,死完翻唔翻倒生仲未知,只知道以後話事權雙手奉送予山姆叔叔,都咪話唔同痕。

至於小米(01810)呢隻官家射住嘅首隻同股不同權股,喺香港市場呢邊地位高人一等,極速獲納入恒綜指數及富時指數,以為坐定笠六成為「港股通」一份子,偏偏中證監企硬。中證監喺小米申請發行CDR時,已經動用二萬大字共超過80個問題招呼小米,家陣又擋住小米加入港股通,可見隺也監管機構,唔多想內地缸邊友接新科技股呢枝火捧。呢個消息一度拖累其股價半日跌近一成,只不過北水唔畀買,唔代表外資唔需要怕,有追蹤相關富時及恒綜指數嘅基金,侷住喺小米估值極度高昂之際,一要被動式掃貨。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads