|
熱門:

2018年7月13日 即巿股評 港股直擊

【盤房來料】王岐山救火隊隊長當之無愧

貿易戰似有緩和跡象,雖然侵侵宣布加碼向中國2000億美元進口商品徵收關稅,但無礙中國救火隊隊長王岐山跟芝加哥市長,雙方會面後,簽署五年產業計劃。喺貿易戰開打之後,呢一次嘅中美合作,正好係一場及時雨,不僅支持內地股市噚日大幅反彈,美股隔晚亦做好,納指更破頂創新高。

隔晚夜期跟ADR已重上28600水平,今早恒指高開208點,一度升234點高見28715點,其後喺A股偏軟下,升幅曾收窄至96點,見28578點半日低位,中午恒指報收28645點,升164點;國指則升46點,報收10799點。大市再一次收復10日線(28504點)。

重磅股普遍回升,但噚日全線做好嘅內銀股則個別發展,建行(00939)續升,中行(03988)跟工行(01398)則下跌。港交所(00388)高開低走,但半日仍錄得0.5%升幅,報收234.6元。美國科技股表現強勁,不少龍頭科技巨企再度破頂,可惜近日被大行調低盈利預測及目標價嘅騰訊(00700)未能回復強勢,只係弱勢反彈,半日升0.6%,報收382.4元,又係高開低走,暫受制10日線。至於大笨象(00005)跟友邦(01299)分別升0.6%及0.5%,反彈力度一般。

資金繼續追捧內需股,蒙牛(02319)半日升4.7%,成為最佳表現藍籌股,其他食品股旺旺(00151)升2%;康師傅(00322)升2.9%;統一(00220)升3%。小米(01810)有阿公幫到出面,前日阿Man都講咗小米有炒作,只係阿Man比較硬頸唔肯食貴米,今日小米再升近一成,突破20元。小米仲可以升到去咩位,講真破咗頂只要資金留戀,仍有條件上試22元,亦即係小米招股定價嘅上限範圍,所謂不到黃河心不死,上市被冷待以下限定價,幸有阿公護航,兼且恒指服務公司幫到出晒面,唔炒番上個招股上限範圍,又點對得住財爺波叔撐到出口。況且大戶出咗咁多call 輪,上市初期唔力托股價,呢批call 輪又如何甩身,成功派晒出街。既然阿Man未有掛牌首日照單全收阿公份心意而掃貨,現價逼近22元水平,更加無興趣高追。

有德國媒體報道,指寶馬於寶馬華晨嘅合資股權將由50%提高至75%,即華晨中國(01114)佔寶馬華晨嘅權益減少,將直接影響華晨中國收入。呢個消息令華晨中國股價昨日急挫,雖然華晨對呢個傳聞加以否認,但市場仍擔心,今日再度捱沽,股價半日再跌4.7%。好老實講,內地放寛外資車企對合營車企嘅持股,最終或令外資車企,唔需要再靠內地車企合作,直接飛起內地拍檔,對內地車企係晴天霹靂嘅消息,一旦呢個政策細則落實,有合資嘅內地車企確係大檸樂。數數內地車企,似乎只有已入股德國戴姆勒嘅吉利(00175)最穩陣,直接成為德國龍頭車企股東,話之內地合資車企政策有何變動。妹夫股果然係妹夫股,有習大大呢個金鐘罩射住係唔同啲。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。