噚日恒指出現Deep V反彈,喺V緊落去時基本上5分鐘圖見恒指5分鐘圖SlowSTC(14,3)見超賣就將之前嘅Put/熊證放走。但係當你見到恒指牛熊證街貨圖,下方牛證又肥又近嘅時候,就可能忍唔住見恒指尾市係咁向上屈,完成個V字第二筆嘅時候,搵隻Put/熊證再次落場,不過今次搵位落場一啲都唔難,難在無位走,事關由噚日個V嘅深深處步反彈到依家(9點50分),5分鐘圖嘅SlowSTC(14,3)都未見過超買。
同事阿Fing返埋今日就結伴去華欣,同佢分享完我之前去華欣嘅好玩嘢之後,依家10點14分,由於我一直開住恒指5分鐘圖同埋報價機,吹完水鏡頭一轉就見到報價機上報恒指粒數見紅,仲要恒指係由今朝嘅升72點變成依家跌145點。雖則今日中午中美貿易就正式開微關稅(叫做正式打貿易戰啦)但似乎未打先插,呢個時候恒指5分鐘圖嘅SlowSTC(14,3)終於都由超買變超賣,呢啲位亦係將你啲Put/熊證走放嘅好時機。
依家10點17分,恒指做緊28098點,跌83點,用呢粒數去量度恒指牛熊證街貨圖,先睇下方牛證先,最貼價嘅係27800至27899點,呢度有相當於780張期指,只要現價向下行多298點,就可以食得到呢度嘅所有街貨。唔單止咁,再向下掃第二同第三層街貨,即27700至27799點同埋27600至27699點,分別有856同859張期指,心算一計:八三廿四,呢三層街貨夾埋咪就係大約咁2400張期指咁重貨囉。
向上睇埋熊證,最貼價嘅就係28300至28399點,呢度有相當於254張期指,要恒指食得晒呢度啲貨嘅話,就要現價向上彈301點先得,「咦?咁咪同下行298點食第一梯隊嘅點數差唔多?」無錯,咁秤恒指的確處於牛同熊中間,但問題在於下方牛證街貨數量比上方熊證為多,唔止多百零二百張咁少,用牛熊各自最近嗰三個範圍嘅街貨秤,頭先心算計過下方牛證約有2400張期指,至於上方熊證,頭三層分別為254、75同311,計數機一計得出640,點鬥?
恒指熊(63337),收回價28882點,同現價有逾800點差距,屬安全之選,且槓桿適中、街貨少;恒指Put( 13514),行使價27868點,輕微價外,槓桿偏高、引伸適中。照舊吼恒指5分鐘圖見超買/賣作買入/賣出,小注為上。
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan