上周五美股個別發展,道指終止八連跌,帶動港股當晚夜期跟ADR齊齊反彈,再加埋人行噚日宣布放水,以為港股點都可以守一守條250日線彈番些少,結果大市反彈乏力,再度下試上周五低位。恒指略為低開12點,咁樣開市已經常降準消息無到,雖然開市後曾升64點,見過29403點半日高位。不過缸邊友有過4月份人行降準,大市一彈即散嘅經驗,反彈把握機會減磅,令港股沽壓沉重,恒指再失250日線(29309),半日最多跌205點,低見29133點,中午收市報收29227點,跌幅略為收窄。國指則跌52點,報收11287點。
阿Man都預咗降準都唔屬於乜嘢利好消息,4月份降準只為放水畀內銀還錢畀人行,今次放水目的更可悲,美其名係推動進一步推進市場化法治化債轉股,實際係逼內銀由債主變股東,債仔無錢還,以股償債,爛帳收唔番,仲要孭多重風險,阿Man都戥啲內銀股可憐。為咗配合阿爺去槓桿,又唔想啲企業連環爆煲,內銀唯有肩負呢個責任,將呢個包袱孭上身。既然放水未能夠揼到去魚缸救市,即係北水亦唔會多咗流入港股,港股彈唔起亦屬意料中事。
況且多個利淡因素仍然充斥市場,包括貿易戰升溫,中美雙方喺距離開徵關稅不足十日嘅時間,仍未見有任何握手言和嘅舉措,反而態度強硬,似乎貿易戰由當初嘅口水戰,極有機會演變為真‧貿易戰。全球貿易戰一旦爆發,相信個個都會成為輸家,暫時呢個陰影仍困擾資本市場,令資金傾向避險,股市當然無運行。
睇番今日半場石油股急升,主要OPEC增產幅度遠低於預期,油價上周五顯著上升,三桶油逆市上升,若然無咗三桶油支撐,恒指今日肯定再見新低。至於內房股亦受壓,原因係人民幣持續貶值,加上內地去槓桿仍未完成,對於一向以債冚債嘅內房股並非好事,銀根緊掘下融資成本上升,內房股或又步入有波幅,冇升幅嘅悶局。油價回升航空股定必遭殃,再加上人仔持續貶值,對以人仔收入為主,以及用歐羅及美元嚟找買飛機數嘅航空股亦無運行,今日內地航空股嘅走勢,剛好跟石油股背道而馳。
五窮月就窮唔晒,但六絕月走唔甩,期指結算前港股雖然仍能守住二萬九水平,但一旦確認250日線失守,港股有機會步入熊市。唔少人問阿Man,咁港股係咪股災喇,熊市係一個漫長跌浪,而股災係由個別事件所引發嘅崩盤式急挫,暫時引發股災嘅負面因素仲未爆煲,至於幾時爆同埋乜事爆,除非有個預知未來嘅水晶球,否則無謂亂咁估。只知道港股一旦確認步入熊市,走勢會跟之前兩年剛剛相反,之前係逢回吐吸納,兼且buy and hold;至於熊市呢,當然係逢反彈減持,炒作博反彈亦只能hit and run。其實以港股整體實際PE計算,現價估值又真係唔算高,可惜內地一直去槓桿,完全抽住港股後腿。而港交所(00388)手鬆鬆放行嘅首隻同股不同權股小米(01810),定出天價招股貴過騰訊(00700)及蘋果,剛招股已被全城唱淡,若然嚟緊要上市嘅新經濟股又係咁款,港股想借新經濟股翻身似乎無望。
麥狄文
(徐狄怡‧證監會持牌人)