熱門:

2018年6月20日 即巿股評 港股直擊

【盤房來料】反彈阻力29650至29800唔易過

雖然隔晚美股受貿易戰升溫繼續下跌,但港股隔晚率先止跌反彈,ADR跟夜期均重上29500水平,目前港股喺29500水平好淡爭持。恒指今早略為高開後,曾反覆向上升162點,高見29630點半日高位,可惜A股持續疲弱,港股被拖累一度回軟,恒指回落至半日低位29406點。但港股反彈之勢重臨,中午恒指報收29588點,升120點;國指則被內地股市抽後腿,半場仍要跌8點,報收11484點。

中美貿易磨擦再陷入困局,內地股市跌破多個重要支持位,港股亦從31500點水平,大幅回落2000點,市場又再議論紛紛,指股災重臨。其實港股一直喺大型區間移動,29500點至32000點水平足足來回咗三個月,走出區間突破亦係時候。加上貿易戰升溫;新興市場貨幣出現暗湧;歐洲政局不穩;各大央行開始收水;以及內地債務違約問題浮現等,確係令市況有向下之嫌。不過種種負面因素,仍未令經濟急轉直下,的確上述問題正處於發酵階段,但未有即時爆煲危險。一旦「侵侵」突然向「習大大」示好,又或者跟其他盟友傾番幾句,無論美股跟港股都有權大幅反彈,即係港股又喺番個區間裏面玩住先。

反而阿Man擔心嘅係內地股市,上證指數失守多個重要支持,所謂嘅3000鐵底竟然不堪一擊,今日外圍大部分股市,包括港股都見反彈,上證指數則毫無反應繼續插水,睇嚟內地股市唔單止受貿易戰問題所困擾,債務違約問題,加上半年結前資金緊拙,都令內地股市6月份無運行。

至於港股反彈至31500水平,阿Man都已感開到荼蘼,建議大家喺三萬一水平上減磅多持現金,結果大市喺短短一星期即大幅回落2000點,甚至失守4月份低位,表現確令人失望。幸而阿Man早已呼籲大家減磅套現,多持現金後等睇世界盃,結果呢幾日確係睇波好過睇市。嚟到現水平,唔少缸邊友都問家陣係唔係時候入場撈貨,阿Man都係抱住寧買貴,莫買錯心態,反正大市呢幾個月以嚟,首次跌穿200日線(29931),而距離250日線(29274)僅一步之距,暫時大市喺250日線前已反彈,但穩陣計要重返200日線之上,即29900水平之上企穩,方有條件扭轉目前弱勢。暫時反彈阻力喺29650至29800點,要重返200日線之上,要先突破呢個反彈阻力,當然內地股市止跌與否,係港股能否靠穩反彈向上嘅關鍵。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads