熱門:

2018年6月11日 即巿股評 港股直擊

【盤房來料】港股暫未有條件突破開單邊

經過上周五急挫,港股今早隨上周五晚美股強勢而反彈,總算收復三萬一失地,亦重上多條移動平均線之上。恒指今早高開58點,雖然曾低見30898點半日低位,其後升過百點,重上100日線(約30991),半日高位見31118點。國指升13點,報收12179點。不過半日成交縮水至424億元,似乎缸邊友喺今個呢禮超級星期,眾多重要事件左右大市情況下,唔敢輕舉妄動。

周末舉行嘅G7領袖會議演變為G6+1,侵侵跟其他G7領袖舌劍唇槍,仲提早離場去獅城見金仔,擺明無計傾。仲要喺社交平台炮轟楓葉國,轉頭又向歐盟開火。而德國大家姐默克爾除咗發表咗一張反映大家唔啱傾嘅照片後,亦形容侵侵咁講法令人沮喪,下月北約領袖會議舉步為艱。

值得留意係港元拆息連升多日,一個月拆息逼近1.5厘,內地Shibor隔夜拆息亦升至2.573厘,中港兩地拆息持續向上,小心息魔隨時來襲。阿Man除咗關心花旗聯儲局議息後議息聲明之外,更關心美國幾時會公布向中國商品徵收關稅嘅清單。雖然中興(00763)獲解禁,被視為中美貿易磨擦重大突破,但侵侵對歐盟跟楓葉國態度強硬,唔見得輕易放過中國。至於特金會未見有特別消息,北韓放棄核武已成事實,最新消息係金仔邀請侵侵出訪平壤,呢吓金仔向美帝投誠,習大唔知會否從此少隻馬。

重磅股均見反彈,加息在即有利大笨象(00005)及友邦(01299)等國際金融股,半日分別升0.5%跟0.6%,市場等待新任CEO范寧首個策略日有乜料爆。不過內銀股表現一般,內地債市又響警號,喺內地收緊信貸及去槓桿影響下,企業融資成本趨升,而多間房企近日發債項目刹車,債務違約問題再引起關注。睇嚟內地又要面對同一局面,即係一救就癲,一癲又伯亂,一亂就死,一死又要救,進入呢個惡性循環,實在難而走出呢個進退失據嘅困局。濠賭股連跌多日後今日反彈,不過阿Man建議仍有貨趁反彈考慮走人,皆因內地銀行撤走銀聯提款機後,對賭收唔多唔少有影響,賭收數據仍有待觀察,一旦持續下跌,料將影響濠賭股全年盈利表現。

至於手機設備股個別發展,上周阿Man講到明唔高追,有消息指蘋果向供應商下達指示,今年新iPhone的零部件訂單將較去年減少20%,板塊內大部份股份逆市向下。至於醫藥股跟教育股,上周五隨大市回吐後,今日又見反彈,都係嗰句,睇住啲平均線做人,若失重要支持位,沽貨咪客氣,始終之前累積巨大升幅,當銀根緊掘,淪為提款機唔出奇。世界杯開鑼在即,阿Man繼續睇好體品股跟內需食品飲品股,今日呢兩個板塊內股份個別發展,總之升勢未扭轉,仍可繼續持有。

預期呢個星期大市維持上落格局,上周五急跌後,今日唔排除係後抽,總之反彈唔升穿31600至31800水平企穩,呢個阻力唔易破,一波反彈完成,又係時候向下調整,不過29800至30000水平支持力頗大,一個阻力位跟一個支持位,上下皆不破,港股仍未有條件開單邊。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads