熱門:

2018年6月4日 即巿股評 港股直擊

【盤房來料】六絕月變數多禍福難料

上星期嘅負面消息,一吓子又消失得無影無踪,本來以為胎死腹中嘅特金會,應可如期舉行;意大利政局不穩,暫時已見緩和,未去到要重新大選,所謂歐債危機,市場暫時話睇佢唔倒;至於中美貿易談判再展開,中興通訊(00763)又傳獲解禁,科技股暫鬆一口氣;至於美國對楓葉國、歐盟同墨西哥徵收鐵鋁關稅,對方向世貿投訴並指要報復,但市場震盪一日後,又係當無事發生。再加上上周五美國公布就業數據理想,歐美股市回升,港股喺當時夜期跟ADR已行先一步,今日高開收復多條平均線,暫時喺三萬一前稍作停步。

恒指今早高開343點,雖然曾略為回吐見過30743點半日低位,但其後升幅再度擴大擴大,半日最多升444點,見30937點,重上10日(30643)、20日(30754)和50日報30579)線,但100日線(30979點)前遇阻力,暫時高位橫行整固。恒指中午報30889點,升397點;國企指數報12179點,升159點。

中資金融股做好,內銀股連彈三日,扭轉之前向下探底弱勢,但目前仍屬反彈,未算得上回復強勢,但買盤動力增強,應該係之前有關MSCI換馬沽盤結束,令內銀股鬆一口氣。內險股亦見資金追捧,有消息指中證監短期內將審核人保集團(01339)回歸A股上市申請,刺激股價半日升7%,A股未有耐上市先興奮,帶動整個內險板塊做好。

至於騰訊(00700)半日升1.7%,但高開413元見過413.4元高位後又見回吐,日線圖開出兩枝陽燭後,今日又裂口見陰燭,股價唔重上420元都係陰氣比較重,可能維持有波幅,冇升幅格局。反而見中移動(00941)半日升1.7%,跟友邦(01229)同騰訊錄得同樣升幅有啲戒心,一向中國移動都係藍燈籠,仲到佢通常個市唔倒嘔都要抖,喺大市未上破100日線(30979)並企穩其上,而大市又喺短短三個交易日反彈近千點之際,阿Man唔建議喺現水平追貨,維持上落市區間移動睇法不變,29800點至31500點,要買貨係三萬樓下先低吸博反彈,三萬一樓上就高沽減磅,家陣又啱啱去番中間位置,再追貨值博率大減。

上個五窮月確係唔太窮,雖然成個月整體下跌,但跌幅尚算溫和,預期六絕月亦唔會太絕,不過反覆震盪之勢不減,尤其今個月有花旗議息結果,市場將聚焦聯儲局對於下半年息口路徑嘅提示。除咗議息之外,歐洲政局暫似緩和,但仍暗存隱憂,即使歐債危機並非一觸即發,但債務問題唔代表唔存在。至於國際貿易磨擦未停,中美貿易談判有待解決,預計六絕月即使唔係太絕,仍難走出框框見突破。加上傳統世界杯舉行期間,成交將偏靜,大市上升需靠成交支撐,成交維持呆滯,大市都係繼續有波幅,冇升幅。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads