熱門:

2018年5月23日 即巿股評 港股直擊

【輪證贏家】冷吼兩桶油開Put

Yo! I'm back! 收到大家嘅email同微博留言問我星期一(5月21日)個檢查搞成點,多謝大家關心,下星期一(28日)先至有報告,暫時都仲未知咩事,不過經過兩日之後,今日隻手已經唔駛再好似Barbie咁,伸直能力已經接近好返咁滯,總之就可以打到字啦(原來做完血管素描隻手係會變咗楊過咁架...唉);btw,今日返工見返戰友Jack,多謝佢嘅手信,可以咬住餅打稿。

繼續跟進返上個星期五若然坐過夜而揸住嘅騰訊熊(59332)先。星期一我喺屋企等夠鐘出門口時,見到恒指裂口上,而騰訊(00700)由9點開始做U盤時嘅升8蚊,到正式開市升5.6蚊,到我做完檢查再坐巴士返公司時又升少咗,至全日收市逆市跌,但(59332)仍然未返到家鄉。到依家9點56分,恒指跌緊248點,做緊30986點;而騰訊就升5蚊,做緊413蚊,(59332)未打靶但賬面仲輸緊。日線圖見騰訊條50天線(415.16元)似乎有啲阻力,而下方仲有一個上星期四(17日)形成嘅上升裂口;不過轉條保歷加通道睇嘅話,騰訊嘅保歷加通道口有拓闊嘅現象,見下方技術標指都係向好,必要時(59332)都真係要我幫佢「安落死」。

又睇緊恒指日線圖,10天線(31049點)一早升穿咗條100天線(30939點),之但係今日條20天線(30661點)穿埋條50天線(30698點),發出「黃金交叉」利好訊號,惜下方技術指標好似MACD同SlowSTC(14,3)都有打橫嘅情況,即反映大市暫未有明確方向,如是者呢個時候落注買大市升/跌,50/50賭大細嘅味道甚濃。

大市方向未定就惟有向個股埋手。早排話地緣政治同中美貿易戰緊張,推高國際油價係咁上;但依家中美貿易戰似乎暫時告一段落,被推高嘅油價升勢亦有位唞一唞氣,同國際油價關係密切嘅中石化(00386)、中石油(00857)同中海油(00883)始見回調。呢三桶油最受油價直接影響嘅其實係中海油,因為呢間公司幾乎完全唔搞石油提煉工作,集中火力搞開採;但如果論走勢圖嘅話,中石油上個星期五同今個星期一高位都係6.55元,「平頂」後今日隨大市下行生咗支大陰燭出嚟,SlowSTC(14,3)亦喺超買範圍下行中,中油Put(13961),行使價5.78元,目前市場上最貼價Put;中海Put(13476),行使價12.52元,兩隻都可以小注冷吼一吓。

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];微博#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads