熱門:

2018年5月18日 即巿股評 港股直擊

【輪證贏家】恒指呈「旗形」

噚日我表妹同阿姨就喺日本返嚟,今日就到戰友Jack同佢太太去日本,我開始懷疑喺日本嘅香港人仲多過喺香港嘅日本人;穿說了,就係今日得我一條友…有啲悶。

依家9點55分,恒指今朝早以升91點嘅姿態開市之後就無里無氣咁下行,一度倒跌過幾廿點架,但依家又升返20點,做緊30962點。日線圖上恒指暫時做過嘅低位係30904點,100天線(30900點)僅僅頂得住,不過畫畫吓畫咗支「旗形」出嚟。咩係「旗形」?「旗形」嘅出現通常大市經過大幅上升或下跌之後,市場進行獲利回吐或空頭回補,咁旗形形態就喺市場價格消化完咗之後,會再度延續升/跌勢;簡單啲嚟講,「旗形」嘅出現就等同「吊頸都要抖吓氣」嘅抖氣位。

再睇返恒指日線圖,恒指由5月7日至14日連續升咗六個交易日,呢條棍就形成咗支「旗桿」,chur升一輪之後買升嘅就會將手上嘅貨高價放走,然後反手入看淡嘅工具,博大市升咁多會回調,於是市場又需要時間去消化一吓個市想點,慢慢地就形成咗「旗幟」,不過日線圖上恒指今日粒燭始終處於「旗幟」嘅中間,再講,呢支「旗」似乎未完成。

依家10點23分,恒指現報30920點(其實個市應該可以參加發呆大賽,贏梗!),開恒指牛熊證街貨圖睇,上方最貼價嘅熊證31600至31699點,呢度有相於1545張期指,仍然都係重貨區,不過同個市嘅距離779點。至於下方嘅最貼價牛證就係30800至30899點,只係呢度得166張期指,但勝在近。若然再比多200點向下行嘅話,即係食埋第二同第三貼價嘅牛證街貨,埋夾就有1667張期指,咁計下行又近又多貨,大家識揀啦。

唔好忘記仲有隻騰訊熊(59332),今日騰訊(00700)雖然都仲見升勢,但日線圖上今日開市至依家股價都係低於50天線(416.21元),即使SlowSTC(14,3)嘅%K線升穿%D線,但始終都仲有個裂口係度,兼且轉條保歷加通道睇嘅話,今日粒燭先至叫做跌返入保歷加通道裡面。今日星期五,都真係要睇吓下半場發生咩事,必要時壯士係要斷臂,如果唔係就唔會有大俠楊過嘅出現。(仇,係可以報嘅)

但願今日繼續下行,就算(59332)要逃生都比個靚啲嘅出口位,唔好咁多濃煙;但願下個星期一(21日)去做檢查後繼續無事(係呀,所以下星期一嘅《輪證贏家》暫停一日,抱歉)。

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];微博#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads