熱門:

2018年5月17日 即巿股評 港股直擊

【輪證贏家】噚日隻騰訊熊 …唉…

噚日揀定隻騰訊熊(59332)出嚟,諗住跟大隊齊齊買企鵝業績見光死啦,喺下半場1點50分左右,見騰訊(00700)5分鐘圖嘅SlowSTC(14,3)出現超買,呢啲位仲唔係送隻熊仔落場嘅好時機,一旦落場心態上就只會出現兩款:1. 見好即收,如是者你會喺下晝2點50分至3點5分呢段時間,騰訊(00700)5分鐘圖嘅SlowSTC(14,3)由超買變超賣時收隊走人,用(59332)5分鐘圖,以1點50分嗰日價0.42元作為買入價,再用3點正(59332)做出嘅0.46元作為出貨價,就咁計到一個鐘頭到已經有9.5%嘅進賬(大佬,你買10萬執9500蚊架啦),而呢個策略小妹噚日下晝3點零喺微博上都同大家分享咗。

至於第2. 就係臨收市前見騰訊5分鐘圖嘅SlowSTC(14,3)出現第二次超買時入貨,呢啲鐘數擺到明就係坐過夜架啦。第一關就先要騰訊出到份業績先,等到就嚟收工到咁滯騰訊先至出業績,首季賺232.9億元人民幣,按年升61%,勝預期;唔緊要,成份業績慢慢由頭到尾睇一次,呢個時候友欄前輩杜比問我點睇騰訊收貨嗎,坦白講睇上去又好似普普通通咁...只可以話無驚喜咁囉,杜比就話:好難估明日(即今日)巿場反應,暫時市場解讀為勝預期,但遜高盛預期。至今朝早開市時騰訊裂口爆升,上返420蚊樓上水平,激死朕!以(59332)噚日臨收市前15分鐘0.425元,同依家9點55分嘅0.275元計,呢度已經輸35.3%。媽,我下次唔敢啦!

咁揸騰訊put/熊嘅係咪就無希望,要止蝕架啦?識得放手當重要啦,但識得幾時放手先令到自己輸嘅幅度可以再減少啲就更架重要。依家10點正,喺公司突然有個印度女人行過,成班同事(包括我)都表示震驚,呢位印度女人喺舊Office時都係坐喺我哋附近,但好日都唔見佢返工,當我哋以為佢唔會搬過嚟嘅時候,突然見到佢出現,好歹我哋都叫做搬咗Office成2.5個星期,佢今日先至第一日蒲頭,由灣仔Office搬過嚟嘅箱都仲未拆,巴閉!

同同事討論完呢個印度女人之後再睇返個市,騰訊10點5分報412.6蚊,今朝高位424.2元就受阻於100天線(426.32元),高開低收下就連條50天線(416.6元)都火速唔見;轉保歷加通道睇嘅話,就會見到今日支實心陽燭成支穿咗上保歷加通道頂,同時保歷加通道口係無拓闊嘅跡象,換言之,可以比多少少耐性去等騰訊會唔會再向下行多幾步,到時再逃走都可以;但千祈唔好話溝貨,諗住用正股溝貨嘅概念套落嚟輪證,因為輪證有槓桿,貨多貨重嘅話其實可以令輸到由999足金變9999千足純金(真係可以輸得好金);再者,正股嚟講按道理都應該溝上唔溝落,點解仲要去投資一啲下行嘅股仔?(調整另計)

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];微博:Gladyshan

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads