睇嚟依家全個銀河系都驚咗個美國10年期債孳息率上到3厘呢個水平,Well,噚晚就堅係掂得到,搞到道指失心瘋跌424點;然後今朝起身咬住個包時見到日經跌百零點,心諗港股應該都係咁上下,再諗噚日班進擊派如果真係入Put嘅話就肥仔啦!
喺地鐵覆完讀者Judy嘅email之後,見到恒指開市報30486點,跌150點;行到返公司坐底開晒所有機之後,依家10點13分,恒指已經跌逾300點,大家最愛嘅騰訊(00700)失守390蚊。睇返噚日計恒指牛熊證街貨量上/下行條數,兩邊都係600幾點,問題只係下行會多203張期指;今日跌300幾點,好明顯下行咗一半,今個星期五(4月27日)就期結啦,唔會唔殺埋佢掛。
睇返恒指日線圖,又係嗰個「楔形」同「三角形」,恒指現水平仍然處於「三角形」嘅尖尖位(我突然間諗起許志安N年前賣牙刷廣告首歌「尖尖尖~尖~尖~」,洗腦到爆),我開始懷疑我唔update個圖係唔會有人發現囉。
走勢未變又唯有再睇恒指牛熊證街貨圖。依家10點23分,恒指現報30303點,跌332點,最低見過30244點,最高未掂到熊證街貨,唔好理。如果用最低位計,30300至30399點呢51張期指率先死亡,呢度係最貼價嘅牛證街貨區,之後再落多100點,即30200至30299點呢度都唔係好多貨啫,得53張期指;而重貨就係喺29900至29999點,呢度有1052張期指,講緊同現價相差304點咋!期指前跌唔無傷干,因為仲有傳說中嘅「五窮」嘛,恒指熊(58895),收回價31400點,同現價有逾1000點距離,所以槓桿唔係特別高,只係約19倍,只係貪佢夠安全啫。
搭單講句,想再Put騰訊嘅朋友留意啦,日線圖SlowSTC(14,3)超賣到極點咁滯, %K線同%D線分別做緊6.23同12.39;但同時14RSI都仲有35.36。即係話要Put嘅話唔係無可能,因為14RSI未見超賣,但係大幅度下挫嘅機會會比較細,因為敏感度高嘅SlowSTC(14,3)已經超賣到不行,睇死騰訊嘅淡友可以揀啲遠期少少嘅put,同埋要有耐性;無嘅就見好即收,採密食當三翻嘅策略。
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。