熱門:

2018年4月24日 即巿股評 港股直擊

【盤房來料】又屆業績期 睇實平保港交所

A股弱咗幾日,終見似樣反彈,上證指數重上3100大關,升逾2%,港股高開高走,打破之前幾日高開低走悶局,又唔知幾多硬頸淡友中招。阿Man強調咗好多次,成個4月份港股都係上落市格局,一宜喺29800至31000點之內上落,一日未突破呢個區間,唔好睇得太好或太淡,過份樂觀或悲觀都冇着數,只宜炒股打游擊,做個靈活炒友,咪將自己標籤為好友或淡友。

恒指高開99點,報30353,開市略回到30335半日低位,但隨住A股愈升愈有,港股亦重拾升勢,一度升400點,見30654點半日高,重上20天線(約30371點)及10天線(約30515)之上。不過50日線(30676點)及100日線(30633點)阻力未能一下子衝破,恒指中午報30578點,升324點;國企指數報12222點,升222點。

上周曾提及內房股受中美貿易戰影響較少,而且首季銷售數據不俗,回吐時可考慮吸納,今日內房股走高,碧桂園(02007)半日升5%最強勁。至於內銀及內險股,喺阿爺放水後理應受惠,但上周升勢僅曇花一現,今日普遍回勇,升幅都喺2%之上。

平保(02318)將於周四公布首季業績,分拆旗下平安好醫生(01833)招股反應不俗,超額已過百倍,暫時平保受制於多條移動平均線,一旦股價能企穩84至85元之上,有望借業績炒番轉,扭轉之前弱勢。至於騰訊(00700)講到分拆QQ音樂,股價仍未見太大突破,其單天保至尊跟大市領頭羊地位不再,半日股價回升不足1%,仍受制400元水平。騰訊自跌穿頸線,即425-428元水平,走勢持續向下,暫時難言轉勢,亦係拖累大市有波幅,冇升幅嘅原因之一。要大市重上31000水平再向好,除非騰訊能回勇,否則大市仍然維持上落格局。

呢段時間都係炒股唔炒市,除咗平保可留意炒業績,港交所(00388)好快會公布有關同股不同權細則,加上下月9日公布業績,業績前有條件落鑊。不過上次業績公布後見光死,留意今次會否案件重演,但未派成績表前,或可向上挑戰270元。

拆息高企已預示香港將迎來息魔,只係息魔登場時間未能確定,估計最快6月份出場。息口趨升對銀行股有利,大笨象(00005)近日持續跑贏大市,ADR股價早已重上78元,港股呢邊一直未能突破78元,一旦78元企穩,下一關當然向80元出發。

至於上星期阿Man建議10元邊可以撈番中教控股(00839),連續兩日都畀晒機會大家上車,今日半場上升3%至10.7元水平,只要大市唔再急速回落,中教有條件再創新高,目標先睇11.5元,自己計好數幾時落車。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads