熱門:

2018年4月23日 即巿股評 港股直擊

【盤房來料】騰訊分拆QQ音樂 遠水未能救近火

中美貿易戰略為降溫,中美雙方願意展開經貿談判,總算為中興事件之後,中美貿易戰帶嚟一個較為正面訊息。那邊廂金仔自動自覺話暫停核試,暫時唔再放飛彈,雖然其誠意仍被唔少國會議員質疑,但總算肯踏出第一步,而侵侵亦願意跟金仔見個面。可惜美國10年債息逼近3厘,令美股受壓,雖然目前喺新加坡黑期略見反彈,但反彈力度相當有限。至於港股低開後表現反覆,暫時喺20日線(30398點)前爭持。

恒指低開91點,報30327,一度倒升64點,見30482點半日高,可惜科技股弱過藥煲,早段曾跌233點,低見30184點。恒指中午報30310點,跌108點;國企指數報12033點,跌21點。半日大市成交額只有485.17億元,預期喺下周內地五一黃金周步近之際,成交只會愈嚟愈奀。

港股成也騰訊(00700),敗也騰訊,即使其餘三大天王嘅平安(02318),因為平安健康(01833)招股做好,半日升1.6%;而大笨象(00005)亦受惠息口趨升,近日跑贏大市;港交所(00388)亦見靠穩,可惜騰訊持續偏軟,港股亦因此易跌難升。騰訊再度失守400元大關,半日報收394.4元,跌1.4%,亦一直喺近日低位徘徊,加上大量牛證街貨喺380-395元等住被劏,大戶鋸呢塊大牛扒似乎機會甚高,而大股東減持批股價405元遲遲未能企穩,呢鋪真係一個肥央就燈死騰訊。雖然有消息指騰訊有意分拆旗下騰訊音樂娛樂上市,預計下半年美國掛牌,估值更高達250億美元。可惜遠水不能救近火,分拆最快要等下半年,暫時騰訊未見有利好消息出爐,企鵝仔短期唔精神。

內地為咗繼續發展5G及科技產業,當務之急係要急起直追IC芯片技術,預計內地將提供更多資源扶持半導體產業,相關半導體股有資金追入,而當中阿Man認為最有前途,當然係喺業內具領導地位嘅龍頭ASM太平洋(00522),股價半日急升最高至115元,但高位見回吐,留意要走勢回復強勢,股價定要企穩112.5元水平之上,否則升勢又係曇花一現。不過手機設備股就跌勢未止,除咗中興事件之外,家吓華為隨時亦被拖埋落水,成為犧牲品,加上市場擔憂iPhoneX銷量如江河日下,相關手機設備股今日再顯著下跌,暫時未係接飛刀時候,寧願睇定些少,謀定而後動。

阿Man之前一直強調,港滙疲弱唔係港股致命傷,拆息向上定必抽住港股後腿,呢兩日港股表現正正可以引證呢一點。由於港滙已略為回升,唔再貼住7.85元弱方兌換保證,金管局呢幾日未見再出手接港元,但1個月及以上拆息持續向上,令港股完全彈唔起,上周五恒指更再失守多條移動平均線,睇嚟除非拆息回順,否則港股唔再跌已偷笑,暫難寄望重上31000水平,尤其50日線及100日線開始匯聚,30600至30700阻力唔少,除非能一舉突破30800點並企穩之上,否則大市喺期指結算前,仍然喺29800至30800之間反覆偏軟。

內需股仍然係資金避險對象,除咗內需股,不妨望多兩眼幾隻基建股,除咗唔大受貿易戰影響,同時亦受惠「一帶一路」持續發展,之前受市場冷落,喺市況再度偏軟下,或再發揮其資金避風港作用。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads