熱門:

2018年4月17日 即巿股評 港股直擊

【盤房來料】超人出手掃長實大市未死得

美國企業盈利繼續交足功課,雖然唔少股份派完份靚靚成績表都見光死,某程度或反映美股估值唔算平,但企業盈利理想,加上經濟數據表現唔錯,美股乘勢做好,三大指數回升。至於港股呢,噚日就唔多精神,之前阿Man千叮萬囑,要留意拆息,港匯疲弱唔係問題,但持續疲弱令拆息抽高,對大市一定係負面影響。即使目前仍未見資金快速咁大規模流走,但銀行體系結餘減少,反映資金流走呢個係不能改變嘅事實。雖然資金流動性仍然相當充裕,但資金流走對股市紿終係負面影響,一日港元仍然緊貼兌換保證弱方,就只會逼住拆息繼續上,對後市點講都係利淡。

不過經過噚日急跌之後,今日再試低位後靠穩,恒指今早高開39點後倒跌,最多跌257點,見30057點半日低位,幸而三萬點見支持拗腰倒升,最多曾升162點,高見30477點,重上10天線(約30367點)。可惜恒指中午報30316點,升不足1點,幾乎打回原形,仍處於多條移動平均線之下。國指報收11989點,跌18點。雖然內地公布經濟數據表現合符預期,但A股仍偏軟,可能同最近又一大批解禁股有關,不過阿Man認為A股要推CDR同準備6月入摩,衰極有個譜,往往最差嘅時候,可能就係否極泰來之時。

重磅股方面,內銀股繼續走軟,大笨象(00005)繼續喺75元附近有買盤吸納,可惜大市要回,佢亦升唔起,但其他金融股跟本地銀行股則上升,友邦(01299)回升1%,恒生(00011)升1.5%;東亞(00023)升1.9%;中銀香港(02388)升0.3%,息魔步近對金融股始終係利好消息。值得留意係受息魔影響嘅地產股,噚日腳軟即見超人出嚟掃貨,動用6億買入超過900萬股,過往超人掃貨都係指標,佢仲肯買貨即係大市未死得,反而佢系內股份批股,多數都係大市見頂先兆。

噚日一個海南概念打殘濠賭股,今日濠賭股反彈,細魔仲發表報告唱好濠賭股,上調多隻股價目標價,新濠國際(00200)創四年高位,半日升逾2%;美高梅中國(02282)急漲5.9%;金沙(01928)升2.6%;銀娛(00027)升1.5%;澳博(00880)漲5.5%。不過,永利澳門(01128)創逾3年半高後,半日倒跌0.2%,睇嚟美高梅中國跟金沙中國有權追落後。

數嚟數去又要講番教育股,呢個板塊唔受息口影響,貿易戰亦唔燒到佢嗰疊,今早又見新高教(02001)上番月內高位,暫時睇吓企唔企穩6元水平,目標不變仍然係坐六望七。至於中教(00839)喺10.5元附近整固,之前連爆幾吓,又係時候抖抖,不過阿Man仍有信心中教未行到盡頭,至少過埋前高位,見一見11.5元。

至於手機設備股因為中興(00763)被美國封殺,禁止美國企業向其出售零部件,並認定中興通訊在2016年和解談判和2017年考驗期內,向其工業和安全局作出虛假陳述。中興停牌,呢鋪又唔知要同美國講數講幾耐。不過山姆叔叔咁做,只係搞到美國嘅企業,但市場擔心呢股風氣會吹埋去手機設備股嗰瓣,瑞聲(02018)挫4.2%;舜宇(02382)挫4.1%;高偉(01415)跌1%;比亞迪電子(00285)跌1.8%;丘鈦(01478)挫3.2%;富智康(02038)創逾9年低,半日跌1.9%,整個板塊插水。暫時未知美國會唔會咁狼死搞埋手機設備供應商,暫時撈底唔好急,謀定而後動。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads