上個星期五恒指呈高開後下行到上半場11點半,分鐘圖出現超賣,所以出現技術性反彈;反彈之後大市都只係喺30700至30900中間游走,無乜明確方向,唔通真係儲貨?所以最終都係無做到任何動作;更何況本身都無諗住做任何嘢,因為要係呢啲不穩嘅市況揸住隻輪證係度膽博膽嘅話,那我倒不如唔揸貨好過。
結果星期六我同我家老爺搭$4.3小巴去同我婆婆、舅父同阿姨食下午茶時,喺茶餐廳見到電視播話美英法用百幾粒導彈打敍利亞,睇到我哋嘩嘩聲!(除咗我婆婆, 因為年紀大,聽嘢唔係好清楚,要我哋係佢耳邊用正常音量同佢講:打仗呀,然後佢慢慢放低杯華田,講句:哦...食飽啦?上去打牌啦...就是永遠的九唔搭八,都唔知係佢真係聽得咁差,還是費事理我)
今朝早恒指開市報30849點,升41點;但搭正9點半之後個市嘅跌勢同黑雨無乜別(陰燭>支燭都係黑色添)。依家10點9分,恒指做緊30450點,跌逾357點,拆恒指5分鐘圖見SlowSTC(14,3)嘅%K線同%D線分別報6.87同7.67,以為已經跌定啦,誰不知個市仲插多嘢,喺10點11分時恒指最低見過30438點,20、50同100天線(30693點、30906點、30582點)全數失守,至於條10天線(30360點)都應該凶多吉少。
個市跌咗成300點,放喺牛熊證街貨圖上只不過係由貼近熊證區,回到落到貼近牛證區。事關最貼價嘅熊證同牛證區,分別係31100至31199點,同30100至30199點,呢度分別有726張同1429張期指。計埋目前嘅市況,三市連跌三日,一個「小圓頂」已經形成,日線圖上雖然SlowSTC(14,3)一位回升,但去到依家中軸水平%K線就跌穿%D線,似有準備回落之勢;更何況如大市要殺街貨的話,現水平再向下行多300幾點就已經到最貼又最重嘅街貨區30100至30199點,呢度有相當於1429張期指,但有咩誘因令到個市再向下行多300點呢?恒指熊(59534),收回價31450點,距離現價有逾900點,安全之選,吼恒指5分鐘圖見超買時小注落場。
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected]