熱門:

2018年3月26日 即巿股評 港股直擊

【盤房來料】唔少重磅股技術走勢開始轉差

受貿易戰陰霾所影響,美股上周五顯著下跌,拖累港股今日再跌穿三萬大關。不過有消息指美國財長出走北京講數,當市場仍然擔心中美貿易戰大爆發之際,中美兩國已悄悄開始幕後談判,討論改善美國對中國市場嘅進入,傳聞談涉及範圍包括金融服務業跟製造業等,雙方正尋求一個認可方式嚟減少貿易逆差。其實阿Man一直強調,特朗普做嘢係估佢唔倒,但侵侵行事雖瘋狂,但亦未至於低能,明知真正貿易戰只會帶嚟攬炒局面,打出呢張牌,一方面係為美國喺國際貿易上爭取最大利益;另一方面係為下半年中期大選作部署,爭取選民支持。預期中美貿易談判至少搞番三幾個星期,呢段時間大市將被相關消息左右,目前大市仍處於100日線(30371點)之下,仍未脫險,當市場一步步消化有關貿易戰消息,大市又能喺兩三個交易日內重上100日線並企穩,港股有望脫險。當然大市仍未走出波動區間,目前仍然喺29800至31800呢二千點上落,但值得留意係唔少重磅股技術走勢開始轉差,呢兩日仍未能逆轉弱勢,後市仍難寄予厚望。

恒指今早開市後曾挫242點,三萬未失守後反彈,跌幅度收窄至10點,見30298點半日高,但30300水平似有阻力,大市再度回軟並跌穿早段低位,最多跌314點,見29995點半日低。幸而三萬大關失而復得,半日收市前跌幅收窄。恒指中午收報30140點,跌168點;國企指數中午收報11990點,跌137點。

騰訊(00700)受制420元,咁啱呢個位係圖表漸次形成頭肩頂走勢嘅頸線位,恒指叫得做騰訊,騰訊有阻力,大市亦唔彈得遠。至於大笨象(00005)完成發債可望再啟動回購,一旦新一輪回購計劃公布,料對其股價有一定支持。至於平保(02318)跟港交所(00388)均見下跌,平保更跌近3%,表現疲弱。

呢期派成績表嘅重磅股,只要業績前股價炒上,放榜後十居其九見光死,嚟緊公布業績嘅內銀股,業績前腳軟,未知會否掉轉行,業績後做番好啲,不過阿Man都唔敢抱太大希望。數嚟數去醫藥股都係強勁,業績前炒到業績後,股價屢創新高,越升越有,強者愈強,所以話醫藥股趁回吐吸納無壞。除咗醫藥股,內需股亦係阿Man一直睇好嘅板塊,啤酒股,乳業股及體品股中都有唔錯表現,眼花撩亂唔知揀乜股好,一於睇住龍頭股,幾時買股都係買行業龍頭。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads