隔晚美股個別發展,港股周末前夕回吐,暫時喺50日線爭持,唔上唔落,半場一個悶字。恒指早段低開178點,一度又穿50日線(31363點)即回升,但半日高位僅見31549點,可惜欠缺動力再升,半日報收31442點,跌98點,暫時喺50日線附近上落。國指則跌76點,報收12643點,主要係內銀股無乜睇頭,國指亦欠缺活力。
港股今日撐得住,主要係靠下周派成績表嘅騰訊(00700)跟平保(02318),兩股喺呢個星期表現回勇,可惜到周末前夕缸邊友傾向保守,兩股今日動力亦開始遜色。不過阿Man有信心兩股均能以佳績示人,呢個星期股價偷步上升,明顯係有春江鴨入場,有貨當然等埋業績公布再決定去留,未有貨者要博業績未嘗不可。尤其今年騰訊跟平保均有業務分拆上市計劃,騰訊旗下QQ音樂跟鬥魚好大機會今年內上市;而平保已落實分拆陸金所及平安好醫生,上市申請亦已進行,陸金所預期最快下季初上市,分拆有助釋放騰訊及平保價值,兩股今年料可跑贏大市。
阿Man喺信報星期三專欄《金融街密語》指出,A股搶發CDR及新交所亦有意調,低同股不同權股份上市門檻,擺明要同港交所(00388)搶生意,即使港交所喺本地市場做獨市生意,但喺IPO生意要面對國際對手競爭,而沙地阿美上市面對估值困難而有阻滯,港交所股價未必能一帆風順。當然阿Man睇好後市,亦唔希望港交所股價行人止步,港交所現價估值唔算平,要股價衝破300元再挑戰新高,必定要成交暢旺及新經濟股未蜂擁而至嚟港股上市,否則港交所可能喺現水平浮沉。
至於內銀股大部份要到月底才公布業績,雖然中銀監下調內銀撥備紅線,曾刺激內銀股周初上升,但遲遲未見北水入場掃貨,甚至更有個別日子沽出內銀股,令內銀股股價又停滯不前。預期業績前內銀股喺現水平先作整固,待業績公布之後再落鑊。值得留意係接近下周聯儲局議息,大笨象(00005)好似多番些少買盤,3月美國加息已無懸念,加息對大笨象係正面消息,其股價業績公布後一直向下沉,有加息消息刺激一下,股價應有支持,但78元阻力唔少,要扭轉跌勢,至少先升越此關。
長和系今日派成績表,市場最關心嘅係超人退休問題,反而系內四股份業績表現變得次要,其實近幾年超人早有部署交捧長子,長和系重大決策均由小超人處理,交棒問題根本唔係問題,對系內股份股價影響有限。科技股一直跑贏大市,尤其軟件股受追奉棒,今日輪到手遊股落鑊,但相對手遊股,阿Man認為軟件股業績更能支持股價向上,小心手遊股升勢屬曇花一現,高追注意風險。
麥狄文
(徐狄怡‧證監會持牌人)