雖然噚日個市似無乜力再上,但亦未至於要插水,不過估佢唔到嘅特朗普,無啦啦炒咗個支持自由貿易嘅國務卿,令本來市場對貿易戰憂慮降溫情緒再次升溫,美股三大指數回軟,強如納指亦終止七連升,更跌逾1%收市。港股就梗係跟住落,本來已唔多夠力水,未能一氣呵成突破31800關就有回吐壓力,家陣美股咁震一震腳軟,港股大條道理落去30900-31000點補番周一個上升裂口。
恒指今早低開279點,見31321點已經係半日高位,其後亞太區股市全面向下,恒指亦穿50天線(約31320點),最多曾跌426點,見31174點半日低位。恒指中午報31206點,跌395點;國企指數報12567點,跌179點,半日大市成交額573.37億元唔算多,回調沽唔唔算嚴重,只係買賣兩閒。
相對之前科恩劈炮唔撈,今次「侵侵」派大信封畀國務卿,市場反應溫和得多,雖然有消息指花旗下星期將公布採取一系列針對中國貿易嘅措施,包括向中國商品徵收高關稅;對中國投資進行限制;以及對中國旅客簽證施加限制等。若然消息屬實,對中國嚟講當然並非好事,但中國一旦報復,花旗亦無好日子過,阿Man估計傳聞歸傳聞,最終公布嘅貿易措施,未必係傳聞中咁嚴厲,可能又係先放風,希望同中國傾吓計。加上侵侵話科恩接任人選,好大機係古德羅(Larry Kudlow),呢位大哥同樣反對貿易戰,即係侵侵並非想堅打一場貿易戰硬仗。
講番大市重磅股,大市腳軟重磅股當然唔精神,騰訊(00700)跌1.3%,半日報收456.6元,跟大市唔穩31800上面一樣,騰訊唔穩460元樓上,亦有機會跟大市一齊落去補裂口,最近一個上升裂口喺445元至455元,未有貨想吼位上車,可以吼位呢個位。至於早兩日強勢嘅內銀股,今日腳軟,建行(00939)跟工行(01398)齊齊跌2%,暫時未見北水掃貨,即使早兩日上升,北水未曾出手,要內銀股繼續走強,睇嚟要等到北水出手至有運行。其他重磅股亦見下跌,但相對跌幅算溫和,大部份股份仍然喺10日線及20日之上,除非再度失守,否則目前只係小小回調,唔需要擔心到以為世界末日咁嘅款。加上阿Man早已預期大市要突破31700-31800水平並企穩上面唔容易,回補上升裂口更有助後市健康發展,只要回補上升裂口之後,能迅速收復50日線,暫時睇唔倒大市再急轉直下,甚至演變為股災。
軟件股逆市走強,資金不過係輪流炒作,炒股唔炒市係目前對應策略,阿Man自踏入三月已表示少理指數短線波動,集中強勢板塊尋寶。金山軟件(03888)已接近目標價30元,半日升3.5%,最高見29.65元兩年半高位。其他軟件股如金蝶國際(00268)、中軟國際(00354)及IGG(00799)等,業績後均獲估值提升,跑贏其他科技股。
今日上市新丁賓仕國際(01705)亦成焦點,隔晚暗盤曾高見2.64元,報收2.3元較招股價1元大升一倍,今日開市報2.75元,夠膽盲衝最高見3.25元,半日報收3.05元,呢啲位仲衝唔衝,講真新股純炒供求,難再用基本因素分析,但賓仕IPO價1元,已預留足夠水位畀中獎者落車,升咗兩三倍再盲衝,阿Man自問無咁嘅膽量,皆因上升空間同回調空間條數計唔掂,既然計唔倒值博率有幾高,買杯珍珠奶茶飲吓算啦。
麥狄文
(徐狄怡‧證監會持牌人)