美股隔晚先升後跌，道指更急挫1.5%，令美股喺二月份錄得自2016年最大單月跌幅，港股隔晚喺夜期及ADR時段已插水。恒指今早低開367點，早段跌390點，低見30453點，見呢兩個星期低位。不過內地股市先低後高，港股亦跟隨拗腰，上半場最多升100點，見30945點半日高，暫受制10天線、20天線和50天線滙聚的31065點水平。恒指中午收報30917點，升72點；國企指數報12410點，升28點。
目前大市係調整中反彈，抑或已調整完成再拾升浪，暫仍未能確定，大市首要企穩多條移動平均線滙聚區，即收復31200點，方能確定有運行，一旦反彈至該水平再掉頭，並失今日低位，已可肯定今個月可能只有波幅，難有升幅。31200點係好淡分水嶺，留意去到呢個位，減倉沽貨抑或再追貨，暫時未宜輕舉妄動。
今日港股急跌後或反彈，早已喺阿Man預期之內，尤其大市若低見30300水平，大戶成功回收牛證重貨區街貨後，反彈機會更大。豈料大市未見30300水平，大市已急急掉頭回升，並出現單日轉向。大家或者奇怪，發行商咁大塊牛扒放到嘴邊，喺30300點至30700點水平，相等於近四千張期指嘅牛證唔全部回收，僅回收30450至30700嗰大約一千張期指牛證即鳴金收兵。原因係呢一批牛證，早於大市高位時派發，即以每股幾毫子派晒出街，當牛證街貨已達百分百，發行商無需再維持秩序，大可任由街貨持有者自相殘殺。而大市急跌後，呢批牛證街貨證價急跌，每股已得番三兩仙，加上市況不穩，持貨者或會以低價自行了斷，即使發行商再以低價接貨，基本上已立於不敗之地，進唔進行強制回收，已經唔重要。
幾隻重磅藍籌股先低後高，騰訊(00700)跟港交所(00388)半日回升逾2%，內銀股跟內險股亦止跌回升，重磅股齊齊帶動大市拗腰。其實踏入業績期，股份派成績表後表現迴異，績優股吸引資金流入再炒上，好似友邦(01299)、玖紙(02689)等，業績後都再升，相反大笨象(00005)業績後見光死，要炒業績股，都唔會百分百贏硬。
不過阿Man認為有業績支持，股價回落反而係吸納好機會，好似港交所(00388)雖然業績後回軟，但今日已回復升勢，主要係市場憧憬今年業績應可勝舊年。不過留意係港交所今年能否盡吸IPO資金池，仍有變數，而同股不同權落實後，成效仍有待反映，所以只宜逢回吐吸納，能否突破300元高位仍有待證實。
至於騰訊受下周指數變動所影響，過去幾個交易日表現不濟，今日反彈，股價要重上445元之上，才能回復強勢，同樣係跌市吸納，建議等候435元水平再考慮。至於阿Man愛股銀娛(00027)，派完成績表後大行調高其目標價，可惜今日公布嘅2月份博彩數據令市場失望，唔排除股價要先向下整固，有意搵位上車，吼65元水平再作打算。
科技股今日表現較為出色，除咗龍頭騰訊最好之外，金山軟件(03888)、(00799)升7.4%；中軟國際(00354)升3.8%；網龍(00777)升1.5%；擎天軟件(01297)升1.9%；美圖(01357)升0.4%，全部報捷。留意個別股份業績公布，或者可以當中尋寶。
麥狄文
(徐狄怡‧證監會持牌人)
