今日個焦點相信都落咗係《財政預算案》身上，派唔派錢、派唔派糖、派幾多錢同點樣派糖，都成為咗近期市場「落注」同「開盤」嘅主題，anyway，小妹都係旦求政府比我交少啲稅同免下差餉，你派錢比我，我就當Bonus，彌補返今朝恒指曾插逾400點，拖低噚日睇中嘅銀河娛樂(00027)，依家10點1分，銀娛做緊68.15元，跌1.7%；揀咗嘅銀河牛(57025)噚日有三個時段可以落場：朝早11點25分、下晝2點25分同埋3點35分，以呢三個時段輪證平均價計就約係0.061元，依家10點3分，見(57025)報0.05元，賬面暫輸11格。不過，恒指係呢個時候跌幅見收窄，睇返銀娛日線圖，10天線(67.29元)升穿咗條20天線(66.92)，呢個「短期黃金交叉」正正係噚日睇中嘅位，好！就比多少少耐性去等隻銀娛出業績！(當然啦，touch wood個市失心瘋再向下插嘅話係無得唔走嘅)
恒指呢期坐過山車都真係坐到頭都暈，眼明手快嘅朋友就當然可以用Call/Put或者牛/熊，用恒指5分鐘，甚至我哋好耐之前慣睇3分鐘圖，用敏感度高嘅SlowSTC(14,3)做來回Trade。
個股又有無得諗呢？比啲耐性總會搵到嘅，不過就無乜心水咁解啫，既然係咁就按藍籌股順次序嚟睇啦，去到第五隻，即係戰友Jack伉儷至愛大笨象(00005)個日線圖有啲計咁喎，連續三日出陰燭雖則又未去到「三飛烏鴉」嘅格局，不過條100天線(79.25元)已經何其樣衰，MACD見「雙熊」都不在話下，條DMI由上個星期二(2月20日)開始至依家，+DI都未升穿返條-DI都算，兩者差距仲愈嚟愈大。好彩， SlowSTC(14,3)%K線(12.68)同%D線(18.54)雙雙進入超賣範圍，轉保歷加通道睇嘅話，現價係未跌到落去保歷加通道底部(77.25元)嘅，但都已經有條件將隻大笨象撥入去「待反彈」嘅List裡面，若然 SlowSTC(14,3)%K線同%D線出現個位數，且股價殺到落去保歷加通道底部嘅話，咁就係反彈嘅時候啦。
至於今日...就睇住份《財政預算案》啦！(親，無論你部電話download咗邊隻新聞/財經app，都準備今日響爆個電話收push notification啦！)
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
