上周五美國10年債息有所回落，帶動美股大幅反彈，港股喺夜期跟ADR已重上31400點水平，成功收復20日線(31345)。今早恒指高開261點，早段高見31567點，其後再度考驗20日線，曾低見31274點，其後喺20日線水平站穩腳，大市重拾升勢，半日升191點，報收31459點；國指則升86點。
重磅股以港交所(00388)最強勁，上市制度改革，為搶佔全球IPO作好準備，唔少大行都唱好，刺激其股價喺明日業績公布前急升，半日報收294.8元，升3%。明日派成績表前又偷步落鑊，令阿Man擔心佢有樣學樣，好似大笨象(00005)一派完成績表見光死，如果未有貨喺手，呢啲價唔建議高追，寧願等埋業績睇吓乜嘢環境再決定。至於有貨喺手，當然繼續持有，留意300元阻力唔細，升唔穿300元，出完業績先食糊亦冇壞。
除咗港交所，其他幾隻重磅股，今日都係高開後乏力再上，唔少中午收市價計仲要出埋陰燭，難免令人覺得個市乏力再向上。騰訊(00700)逆市跌少少，仲有三個星期先派成績表，暫時先作整固，冇乜必要咁快炒上去破頂。至於平保(02318)同樣仲有幾個星期先公布業績，不過港交所交改革上市制度，有助平保旗下業務加快分拆上市步伐，全城期待嘅陸金所同埋平安好醫生，如無意外上半年可分拆上市，平安好醫生更已完成一輪Pre IPO，唔少大孖沙已入股，平保目前於87元之前橫行，要博業績同分拆，85元至87元之間可收集。
吉利(00175)母公司入股平治汽車母企戴姆勒近一成股權，成為其最大股東，內地汽車業有意問鼎全球汽車業一哥寶座之心昭然若揭，市場對入股消息反應正面，認為吉利透過入股換取技術，對其日後發展有利。吉利半日股價升逾8%，成為最佳表現藍籌股。而長汽(02333)亦跟寶馬簽意向書，共同發展新能源汽車，大行亦睇好，半日股價升6%。阿Man早於去年底已表示，今年仍睇好汽車板塊，雖然全年升幅未必及舊年咁勁，但整體業績今亦唔會失禮。
至於阿Man一直睇好嘅醫藥股，今日亦落鑊，兩隻已推介過嘅龍頭股石藥(01093)同中生製藥(01177)，分別升2.7%及3.8%，前者下周正式晉身國指成份股，後者則成為「港股通」新經濟股。雖然教育股今日表現 一般，但呢個板塊阿Man今年亦睇好，不妨趁回吐收集，教育股隨住需求增加，今年仍可睇高一線。
大市喺明日期指結算前，應唔會有太大突破，但目前正以一個底部高於一個底部嘅形態向上推進，但要大市重拾升軌，除咗要企穩20日線之外，定必要回補大型下跌裂口31600-31700點，否則表現仍然反覆，可能又喺一千點內上上落落。
麥狄文
(徐狄怡‧證監會持牌人)
