熱門:

2018年2月22日 即巿股評 港股直擊

【輪證贏家】市況太Chok,Day Trade算啦

哼!一如所料今日A股開市,上證升逾1%開個紅盤出嚟,到依家9點56分,罰抄完個地址寄嘢比親愛嘅Data Provider Zoe之後,見到上證粒數依然都係紅色(留意番,內地係紅升綠跌嘅),都話A股開紅盤個意義係比港股更大更強加啦;但呢個世界有樣嘢叫「好境不常」,港股唔知攞景定贈慶,今朝晨早開先唔見347點;喺10點3分嘅時候我send咗個notification push出嚟「恒指跌幅曾幅大至逾500點 港股通重開,截至十時錄得資金淨流入逾3億元。」執定出嚟嘅A中Call(20735)暫時跌咗6格,見安碩A50中國(02823)暫時日線圖上呈「T星」,且50天線(15.92元)都仲叫做失而復得,(20735)就揸多陣啦,但策略上都係要搵個位閃人嘅。

睇返恒指,坦白講呢條友仔日升日跌都算,但下下都Chok到咁,佢都真係幾唔明白老人家會暈船浪架嘛,出完個notification push之後,個市由原先最多跌逾500點,變返熟悉嘅跌300零點。

偷聽完隔離會計部講噚晚套真人Show,講兩個做舞台劇嘅人去咗泰國賣嘢食比遊客做老闆之後,個恒指街貨圖都同步load完,依家10點19分,恒指報31143點,跌288點,跌幅明顯收窄咗好多,用呢粒數放上恒指牛熊證街貨圖睇,最貼價嘅牛證係30400至30499點,呢度有過千張期指;至於最貼價嘅熊證係31400至31499點,期指張數唔多,得72張。兩者比較之下咁好明顯下行嘅牛證有兩個重貨區,貨夠多,但路程實在太遠;上行雖然少但勝在夠近,仲有,若然個市拗腰得咁有力水嘅話,再上多100點,即31500至31599點,呢度都有成584張期指,唔失禮呀。

開返恒指日線圖睇,個市呢期雖然係Chok,而頂底就分別有20天線(31495點)同條50天線(30849點)夾住;就算唔怕條10天線向下跌穿條100天線(29792點),都擔心下條20天線會唔會跌穿條50天線,又生多個「死亡交叉」出嚟。呢啲時候唯有向分鐘圖埋手,既然一個朝早可以由跌500點變跌200幾點嘅話,即係話做day trade都有機會執到雞,用條5分鐘SlowSTC(14,3)擺出嚟嘅超賣同超買,入Call同Put或牛同熊證做來回trade,搵啲貼價啲、槓桿高啲嘅輪證,博一下爆完就閃。

一班大老闆好似群星咁周圍派開工利是,仲係用我哋designer出品嘅利是封,盛讚不得止,仲讚到designer妹妹紅到面晒;今年你咩都唔駛做架啦,諗定出年個利是封啦。

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads