|
熱門:

2018年2月13日 即巿股評 港股直擊

【輪證贏家】方向未明 暫不動

噚日恒指嚟一招先高後低,一幅死氣沉沉嘅樣都真係呃得吓人,好彩都擘大隻眼望清楚恒指日線圖上啲技術指標有低位反彈嘅跡象,惜見到恒指牛熊證街貨圖時,下行食牛個機會率似係高過上行食熊,係左右為難嘅情況之下,唯有咩都唔好做,坐定定係度。

今朝恒指無啦啦反彈逾400點開市,開市報29850點;到正式開市之後恒指繼續向上行,依家10點39分,同個地產PR Chloe傾住whatsapp先發現個市已經彈咗上去30000點樓上,日線圖上見到恒指今日粒燭彈咗上去100天線(29636點)之上,下方嘅14RSI、MACD同SlowSTC(14,3)都出現低位反彈嘅清況,就連DMI嘅+DI都由低位向上,準備同-DI相遇;都啱嘅,上面有兩個裂口,一個上星期五(2月9日),29679至30251點,第二個就係上星期三(7日),31472至31712點。依家10點54分,以恒指暫時做過嘅高位30148點計,距離第一個裂口只係爭103點咁大吧!

開恒指牛熊證街貨圖睇,依家10點57分,恒指做緊30090點,用呢口價計數嘅話,下方最貼價嘅牛證係29100至29199點,呢度有相當於1026張期指,唔好話係牛證重貨區,根本就係成個表裡面最重貨嘅一行,同現價比嘅話,只要大市下行990點就可以食到呢餐。

至於上方熊證,最貼價就係32000至32099點,呢度有新增121張期指,應該係噚日見到恒指先低後高時估大市會向下行而入貼價熊嘅,不過又唔駛驚,就算依家個市升咗成600幾點,但呢個位置同現價仲有成2009點嘅差距,更何況如果個市彈得返上去32000點呢度嘅話,未計升多99點食個堆期指啦,頭先講嗰兩個裂口都補晒啦。

拆完個情況其實同噚日好似差唔多,技術指標仍然看好,但恒指牛熊證街貨方面就似係下行吸引啲,係無一個比較明確嘅方向之前,都係繼續坐定定係度,諗下聽晚情人節同我家老爺去邊度。

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。