美股隔晚崩盤暴跌，道指跟標指創單日最大跌幅，喺亞洲時段道指期貨繼續食瀉藥，較隔晚現貨收市而跌逾千點，回落至23100點水平，幾乎將2017年度升幅蒸發一半。美股打柴，令全球股市急挫，港股當然唔例外，臨近中午散場，跌幅進一步擴大，直殺落50日線。而阿Man執筆之際，港股喺新加玻黑期已再跌200點，低見30300點水平，下試去年11月底所創高位30200尋找支持。
恒指裂口低開1216點，開市後跌幅一度收窄至959點，見31286點半日高，可惜獲利沽盤夾住止蝕沽盤，令大市持續受壓。臨近中午最多曾跌1617點，低見30628點，逼近50天線(約30591點)，恒指中午收報30651點，跌1593點；國企指數報12657點，跌822點或6.1%，大市成交額1384.94億元。
指數成份股全軍盡墨，跌幅最低消費2%，中移動(00941)之前升得少，自然跌得少，僅跌2.8%，其他累計升幅大嘅股份，閒閒地跌5%或以上。至於呢期大媽至愛嘅內銀股，普遍下挫6%或以上。大市超過九成股份下跌，跌勢相當全面，阿Man早預大市有此一着，早已預告大家，1月份期指結算後，大戶要大開殺戒，劏肥牛開和牛大餐。
由於早已通知大家喺三萬三水平減倉套利，留待調整低吸，今日正好係一個入貨好機會，當然美股咁樣跳樓法，唔少缸邊友會認為股災殺到，現水平唔應該入場。阿Man認為別人恐懼時，點都要拎少少勇氣出嚟，呢個時候入場先買一注正股，唔做孖展，又唔買衍生工具，呢個水平，即接近50日線，已經可以入貨。
至於港股呢邊，最盡畀佢跌多三兩百點，去番11月高位都係30200點，1月開局位喺30000點左右，目前喺30600點水平，差嗰幾百點又何懼之有，面對波動嘅狂牛，一定要有番咁上下膽色。
麥狄文
(徐狄怡‧證監會持牌人)
