熱門:

2018年2月1日 即巿股評 港股直擊

【盤房來料】大市重返10日線下表現反覆

隔晚FOMC議息,預咗今個月維持利率不變,美股周二晚急跌後,隔晚反彈,可惜”侵侵”嘅國情咨文,只能振奮華爾街一陣子,美股表現反覆,最終收市三大指數嘅反彈力度有限。至於港股高開後,恒指早段曾升160點,重上三萬三水平,可惜此關得而復失,加上內地股市跌幅擴大,港股轉升為跌,半日恒指倒跌143點,報收32743點;國指則跌28點,報收13533點。

以為重磅指數股率先見底,昨日升勢似幻似虛,今日已打回原形,回復跌勢,騰訊(00700)跌1.2元,報收462.4元,10日線由支持變阻力,同樣情況發生喺港交所(00388)同埋平保(02318)身上,兩股分別跌1.8%及 1.7%。大笨象(00005)今日叫頂得吓,可能股價已到20日線(84元),暫時喺現水平爭持。

少咗幾隻重磅指數股撐場,好友又係搵內銀股力托,不過龍頭建行(00939)先升後回,半日升幅縮水至0.1%。工行(01398)呢期有北水掃貨,半日再升近2%;其他內銀股普遍見完高位都升幅縮水,留意當中唔少股份上半場日線圖出針頂再轉陰燭。呢期資金不斷追捧資源股,即係阿Man唔多like嘅板塊之一,不過資源價格持續回升係事實,只係呢類股份高追免問,寧願等回吐吸納。

噚日阿Man已表示,未能確認大市已完全調整,抑或只係配合月結跟OTC結算嘅挾倉而作反彈,唔好衝動又盲搶貨,即使走勢猶如過山車,仍要保持鎮靜,市動心不動,反正已有部署,除非大市企穩33100點,兼且再有買入訊號,否則堅持眼看手勿動,尤其係幾隻指數重磅股,有平貨可以坐,短炒高追嘅有食要食,失守睇錯就要打靶。

抽新股博一博

反正大市表現反覆,而最近新股上市表現不俗,不如抽新股博一博,本小利大,隨時刀仔鋸大樹。創板股佳民集團(08519)正進行招股,集團旗下旗艦餐廳都爹利會館是中環財俊及公子閨秀名媛嘅主要飯堂,為米芝蓮星級餐廳。而集團主席行政總裁兼執行董事黃佩茵,喺本地餐飲界大有來頭,為城中名媛,亦係另一上市餐飲集團Classified Group (08232) 的執董及主要股東之一羅揚傑嘅太太,跟城中嘅富二代關係友好,難怪今次招股,聽聞不少上流社會都有興趣落飛。既然大市需要反覆整固,重磅籃籌表現較反覆,不少缸邊友轉炒小型新股,創板新股更炒至飛沙走石。而創業板改例在即,在2月後 申請上市的創業板股份申請轉往主板將遠較現時上市的創業板新股困難,所以現上市的創業板股份價值及值博率甚高。而佳民集團招股一口價0.3元,抽得到應有水位食糊。不過記住玩新股嘅遊戲規則,上市後幾日之內有食要食,否則唔知等到幾時再開車。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads