隔晚美股個別發展，三大指數盤中再創高位，不過除咗道指喺金融股支撐下，收市仍報升，其餘兩指數倒跌收市。至於港股今早略為高開，曾見32998點半日高位後，三萬三前掉頭回落，最多跌270點，低見32688點。其後幾隻重磅股低位反彈，恒指跌幅亦收窄，半日跌105點，報收32856點；國指則跌125點，半日報收13495點。今日會唔會喺下半場又玩倒升無人知，不過已屆三萬三水平，唔值得太進取追貨，尤其結算後有機會出現較大調整，重貨嘅缸邊友要識執生。
油價再升，三桶油繼續造好，中石油(00857)及中石化(00386)升逾2%，中海油(00883)則錄得1.2%升幅。至於四大股王今日齊齊下跌，早段跌勢較明顯，至接近中午收市價跌幅收窄，跌幅全部不超過1%。至於內銀股繼續回吐，建行(00939)最強跌得少，只跌0.7%，始終呢兩日北水大量流入，一日北水唔走，建行都難大跌。至於工行(01398)跟中行(03988)則跌近2%。
油價造好，其他大宗商品價格亦拍住上，資源股又落鑊，不過阿Man講過資源股難炒，自問有番咁上下功力，唔反對閣下去趁熱鬧。由於金價爆升，今日資源股最厲害係黃金股，不過阿Man講過好多次，資源股炒作好短癮，入場玩記得轉身要夠快。
北控水務(00371)配股，配股價落實5.9元，集資約26.55億元，同時以同樣作價向阿媽伸手，配售1.69億新股，額外集資10億元。半日股價跌4.8%，仍守配股價，其實北控水務前景唔錯，集資係為未來收購鋪路，加上阿媽都肯科水10億，長遠嚟講係好事，現價買入有得博，失守5.7元打靶，大行都睇好佢前景，目標價平均7.7元。
美高梅中國(02282)嘅美獅美高梅延遲開幕，加上獲批出中場賭枱只有125張，數目不似市場預期，拖累股價早段曾跌8%，半日收市跌5.4%。其他濠賭股亦普遍向下，前日阿Man提到濠賭股雖然破咗高位，但當日多隻股份均以陰燭報收，短期大有機會回吐，短炒不妨先沽貨套利。睇多兩日股價回調後，能否打底見支持，呢個板塊今年睇高一線，每次回調都係撈貨機會。
北控系呢期動作多多，除咗北控水務集資外，北控旗下嘅北燃藍天(06828)亦有動作，同樣配股但就只係配售畀泰國能源投資公司GPS總裁同主要股東，並與GPS簽訂戰略合作協議，以拓展東南亞、東北亞（包括中華人民共和國）及大洋洲嘅能源相關市場。跟北控水務唔同嘅係，北燃藍天以溢價配股，配股價0.57元，今日股價升7.4%，半日報收0.58元，企定定喺配股價之上。之前阿Man喺0.5元附近都有推介過北燃藍天，講到明今年收購注資陸續有來。踏入一月份就引入外國投資者，瞲嚟呆滯咗成年嘅北燃藍天，今年可以做番場好戲。加上北燃藍天嘅全產業鏈布局已初步完成，而天然氣行業的快速發展，公司將成為天然氣行業主要受益者，值得期待。
麥狄文
(徐狄怡‧證監會持牌人)
