熱門:

2018年1月19日 即巿股評 港股直擊

【輪證贏家】睇定啲先啦!

噚日恒指再嚟多次創歷史新高,見32233點,不過裂口高開之後,拆開恒指5分鐘圖睇,竟然出現一浪低於一浪嘅形態,仲係朝早11點半到就已經補咗朝早開市個裂口,下行嘅情況持續,至咗下晝兩點鐘到,恒指倒跌不得止,仲做咗全日低位31869點,好彩,低位過後鐘擺再次向上,收市時都叫做爬返上32000點,不過日線圖見就一粒「十字星」走咗出嚟囉。

「十字星」就代表轉勢,即係話有機會由本來嘅升轉為跌啦,「吓?啱啱先創完新高咋喎!咁快又話要跌?」唔好一聽到個跌字就咁驚啦,就算係「大漲」,中間都會有「小回」嘅情況出現架嘛;更何況恒指日線圖上啲技術指標幾乎全數超買再超買中,假設後市真係想上到39000點(打個比喻),係咪都要令個市冷靜一下之後再升會比較健康同合理?都係嗰句:超市減價都可以會mark高少少先至再加個減價牌,令到唔常去超市格價嘅師奶們有一種感覺係「好抵呀!」,然後就將件貨擺落架車仔度。

再睇恒指牛熊證街貨圖,上方熊證數量真係寥寥無幾,依家10點9分,恒指現價32082點上方最貼價嘅熊證係32200至32299點,呢度有相當於99張期指,同現價比相差217點;如果再上多100點嘅話,即係32300至32399點,呢度就有相當於425張期指,數量係多啲,不過講嚟呢425張期指已經係熊證嘅第二重區,第一重區貨講緊係32500至32599點,但呢度都只係得588張期指。

至於下方牛證就真係大把貨,一睇就見到有三個過千張期指嘅街貨範圍係度,最重嘅係31200至31299點,呢度有相當於1591張期指,亦係重貨區no.1,咁當然同現價比較嘅話(用返10點9分mark底嗰口價32082點計),同現價有882點差距,與此同時,如果大市真係下行到呢個位嚟食最重牛證嘅話,佢首先要跌穿10天線(31494點)先。

明白市況係強,作為老散係要敬畏市場;之但係大市再上升嘅力度始見有減弱跡象,再加上VHSI爆升過後都回落,意味大市波幅又再度減少,係未見明確方向同波幅可圖嘅情況下,即使恒指唔下行,但橫行嘅機會仍然存在,對於要面對時間值損耗嘅輪證嚟講實在唔係咁着數,建議繼續壁上觀。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads